uMthunywa
YiNtatheli kaMthunywa
Abafundisi abasemzini weManama Mission ngaphansi kweEvangelical Lutheran Church of Zimbabwe baveze ukukhonona okukhulu ngokuthi abasakhulayo abafuni ukuza enkonzweni kanye lokuthathela phezulu umsebenzi wobufundisi.
Lokhu kuvele mhla ibandla leELCZ libonga abafundisi balo asebekhulile njalo asebatshiya umsebenzi wokumela ibandla lokutshumayela.
Ukusilela kwentsha ekhuthalele umsebenzi wokutshumayela ivangeli lesiKhristu kuhlupha amabandla amanengi.
Kumbuthano yabafundisi sekukhulunywe kabanzi, kwabekwa isicelo sokuthi abazali baze labantwababo enkonzweni.
Ngokutsho kwabafundisi beELCZ eManama, lesi yiso isikhathi sokuthi abasakhulayo bathathele phezulu imisebenzi yokutshumayela ngoba abafundisi abakhona sebebadala.
Iphephandaba likazulu lifike eManama kumaviki amabili adluleyo lapho okwethulwe khona isikhalazo lesi.
Abafundisi asebatshiya umsebenzi kulelibandla benzelwe idili lokubabonga ukuzinikela kwabo ebandleni.
Abafundisi laba baphiwe impahla lokudla.
Isikhulu seELCZ kumhlubulo weWest Diocese uBishop Misheck Dube uthe loba bebonga abafundisi asebekhulile, bazaqhubekela phambili bencenga abasakhulayo ukuthi baphatheke ekukhokheleni ukholo lwesiKhristu.
“Ibandla leELCZ lapha eManama Mission likubone kufanele ukuthi sibuthanise abafundisi bonke ababetshumayela kulelibandla. Sikhethe ukuthi sibabonge ngokubaphathisa ngokudla langempahla. Bavele endaweni ezitshiyeneyo.
“Esikhathini esinengi nxa umfundisi engatshiya ukutshumayela impilo yakhe iyaguquka, bacine beswela okuthile. Njengebandla lokholo lwesiKhristu, silandela imilayo kaNkulunkulu,” kutsho uBishop Dube.
Uqhubeke wathi: “Siyazibuza-ke ukuthi baphi abantwana abazathatha ubufundisi nxa thina sesigugile?
Abantwabethu bangothathekile, bagijimela into zomhlaba betshiya ezokholo.”
