uMthunywa
Nkosilathi Sibanda
ZIBUHLUNGU inhliziyo zabalandeli beDynamos ngokukhangela isimo saleliqembu eliseduzane lokukhitshwa kuligi yeCastle Lager.
Loba besizwa ubuhlungu, abalandeli abakhulume loMthunywa kuliviki babike ukuba ithimu yabo angeke ikwenze ukuthi ixotshwe enkundleni enkulu.
Bathe nxa kungela Dynamos, kuyabe kungelamncintiswano ozwayo kunguqu yakuleli.
Labanye abalandeli bamaqembu abalisa iHighlanders, Caps United leChicken Inn bavumelana lokuthi nxa iDynamos ingaphuma kuPSL, akusoke kube lenguqu ehlabusayo.
UDarrel Chengeto osekela iDynamos uthe akujabulisi ukuthi iqembu lakhe lihlezi kunombolo yetshumi lanhlanu kungalane yamaqembu.
“Asazi ukuthi sizacatsha ngaphi nxa iDynamos isiphume kuligi. Akukholweki ngitsho ukuba singabhayiza sizibone kuligi ka-Division One,” kutsho lumdlali.
UTimothy Dhliwayo osekela iDeMbare ekoBulawayo uthe kungabe kubuhlungu ukwehlika kweqembu kodwa banengi abalethemba lokuthi angeke iphume kuPSL.
“Mina ngiyala ukuthi ingakhitshwa. Ayisimi ngedwa futhi. Pho kuzaba lenguqu nxa iDynamos ingekho. Sizaphela sibone kodwa ayiphumi.”
Kuzamangalisa ukuthola ukuthi labeHighlanders bafisa ukuthi iDynamos ingaphumi.
“Iqiniso yikuthi akujabulisi ukubona iqembu elilabalandeli abanengi liqunywa lizembe kuPSL. Imidlalo yethu leDynamos iligugu kunguqu yeZimbabwe. Sikhuthaza ukuthi abadlali beDynamos bephakamise umdlalo wabo banqobe kumidlalo emihlanu eseleyo. Siyayifuna kuligi ithimu le,” kutsho uBekithemba Ncube oselokitshini leMagwegwe.
Umsekeli weBosso omkhulu uNkululeko Tshambo ubike ngokudana okukhulu ukuthi balutshwane abasekeli boqobo abajabulileyo ngokudlala kweqembu elikhulu njengeDynamos.
Uthe usola abadlali abakhona ngoba abaselayo intshukuntshu yokudlalela ukunqoba. Wengeze njalo esithi isisindo seDynamos siyafana leseBosso ngenxa yokuyekethisa kwabadlali.
Ukhulume lokhu enikeza umzekeliso wokudibana kwamaqembu womabili.
Akusela dlabuzane. Ayisimi ngedwa engikubona njalo, ngikhuluma okusenhliziyweni zenengi lethu. Abadlali bakhathesi basephula inhliziyo,” kutsho uTshambo.
UCosmas Dzirutwe osekela iDynamos uvumelane lokukhulunywe nguTshambo.
“Sesilandela ithimu yethu ngoba akula eyinye esingayisekela. Iqiniso elibuhlungu yikuthi abadlali bayasidanisa. Kusasa bayanqoba, ngeviki ezayo bayadliwa, pho kubizwa kuthiweni lokho?
IDynamos isidonse insuku iphela idlabuzane ngenxa yokwehluleka ukunqoba kumidlalo yayo kuligi yeCastle Lager.
Lithole induduzo ngempelaviki edluleyo ngokunqoba iHerentals kuhlandla lama-quarter finals enkezo yeChibuku.
Kulumdlalo iDeMbare inqobe ngembekwa nge 5-4, kodwa umdlalo lo ubulakho ukuthi unqotshwe yiHerentals esuke yadlalisa ithuba layo ekucineni.
Kumidlalo yonke, iqembu leli selihlohlwe njalonje. Ukunqotshwa kwalo kuyinjwayelo okuyikho okumele kutshintshe kungakafiki isibanga sokucina kumaviki alandelayo.
