Ayihlabi Ngakumisa: P Ndebele

06 Sep, 2018 - 00:09 0 Views

uMthunywa

Silo C Dube kugwalo
KUVIKI ephelileyo sitshiye uSwabide Khumalo esegolonjweyinkulumo yomkakhe uMaNdlovu wacina eseveza imfihlo eyayingakaphumeli egcekeni eyokuthi uNothando lo ayemsola ngokungathi kaphathi kuhle uNkosi kwakungenzeka asuke koBulawayo.

Emtshela lokuthi wayengakwazi ukuthi wayezamthatha ngaphi owayezasala emgcinela umntanakhe njengoNothando? Kwamethusa ukuzwa lokho uMaNdlovu wabuza ukuthi wayesitshoni uKhumalo.

UKhumalo wamtshela ukuthi wayezasuka esiyakwenda uNothando. Kaze akukholwa lokho uMaNdlovu ethi uKhumalo kayekele ukudlala ngaye. Wathi wayecabanga ukuthi uKhumalo wayesiza lendaba kanti wayedlala ngaye. UKhumalo wathi wayengadlali ngaye ebuza ukuthi kanti uNothando wayengakamtsheli yini ukuthi wayesezwanana loVundla umsekeli wakhe uKhumalo esikolo? Wala ukukukholwa lokho uMaNdlovu ebuza ukuthi kungani uKhumalo wayedlala ngaye.

Wakhuluma amagama ayeseyisa uVundla ebuza ukuthi uNothando angabe esweleni aze athandane lexhegu elinguVundla. Wathi uVundla wakhe lowo wayeyinsumbelume eyaziwayo. UKhumalo wamkhuza ethi engamphoxi uVundla ngoba uVundla eyindoda elungileyo njalo ethembekileyo. Wagcizelela uKhumalo emazisa uMaNdlovu ukuthi nxa wayengakayizwa indaba yomnawakhe, yena wayeseyizwile njalo ethi uVundla wayemlume indlebe ngayo. UMaNdlovu wajinga elokhu ephika ebuza lokuthi uVundla wayemazela ngaphi uNothando?

UKhumalo wakhumbuza uMaNdlovu ukuthi uNothando aze afike kwabo kulowayamnyaka bahamba bonke esikolo, yikho lapho ababonana khona. Wamkhumbuza njalo ukuthi uVundla efika lemfa kagogo wabantwana angithi wayethe uthunywe nguNothando ukuthi azobatshela. Wathi ekhuluma nje, uVundla wayesengotshintshela koBulawayo ukuze abe seduze lomnawakhe kaMaNdlovu, uNothando.

Ngokungakholwa wabuza uMaNdlovu ukuthi yena Khumalo wayekwaze nini lokho?

UKhumalo esthe kwakulensuku wabuza uMaNdlovu ukuthi kungani engamtshelanga? UKhumalo yindodandoda engasiphakaphaka eliphonguthi lingezwa ulutho selihamba lipepetsha ngayo indawana yonke.

Uthi kuMaNdlovu, “Lami bengilindele ukuzwa ngawe ngisithi kumbe usekutshelile owakwenu.” UMaNdlovu uqhubeka ebuza ukuthi wayekukhulume njani ngaleso sikhathi? UKhumalo njengomuntu okwazi ukukhuluma umtshela ukuthi wayegolonjwe nguye uMaNdlovu owayekhuluma kubi ngomuntu owayesezaqhelisa isibaya sakwabo.

Lokhu uKhumalo wayekutsho ngoba uVundla wayesezalobola uNothando. Kwakulotsholwa ngenkomo ngaleyondlela isibaya sakoMaNdlovu sasesizaqhela ngoba sezandile inkomo. UMaNdlovu yena ukuthatha ngokuthi uKhumalo ukhuluma nje kungenxa yesikhwele. Useveza ukuthi wayekwazi ukuthi uKhumalo wayedlela kuNothando. Uqhubeka ethi kade wakubona lokho. Ubuza uKhumalo ukuthi manje wayesezakuthini njengoba uVundla esemthathele umlamu wakhe nxa kuyikuthi lokho ayekutsho kwakuliqiniso.

UKhumalo yena uzibeka isibindi ethi: “Ukukhonjwa kukaVundla akutsho lutho. Umlamu uzakwala engumlamu wami aze ayetshona egodini.” Kwakunjalo kusadliwa ngoludala. UMaNdlovu umletha eqinisweni uKhumalo ethi, “Loba kunjalo kodwa akufanani lokomlamu osazimele yedwa. Osendile, usehlonipheka.

Umkhwenyabo angazake amlandele emasekweni. Ukulamuza kwakuyinto eyayisenzakala njalo ingamangalisi izolo, kodwa lamhla akwenzakali lokho. UKhumalo uvumelana loMaNdlovu ethi uqinisile, kwakumphoxile okuVundla yena wayesithi usakhula uNothando.

Uyaziqinisa njalo uKhumalo ethi akuselani, wayesezathola umfana wokuthuma. Wayaphambili ethi into emjabulisayo yikuthi wayekhethe kuhle umlamu wakhe ethi uVundla yindoda qho. Wathi indoda kayilaxhegu esiyaphambili ethi wayezagcineka kuhle umnawakhe kaMaNdlovu.

Imicabango ngekusasa kaNkosiphile ivusa ukhophe emzini kaKhumalo. Zwana ukuthi kwenzakalani kuzibanga ezizayo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds