uMthunywa
Silo C Dube kugwalo
SIQHUBEKA ngodaba lwemuli kaSwabide Khumalo lemuli yakhe. Ingane uNkosiphile eyayimele idluliswe izalwa ngombo wezalukazi leziya uMaKhuphe loMaNsingo isikhulile isifunda esikolo seSir Humphrey Gibbs.
Usefundile umfana ngoba usesenelisa ukuzenzela izinto ezinengi okujabulisa labazali bakhe kanye lonina omncane uNothando yena owaphiwa umlandu uthi abe esiyamkhangela ngesikolo.
Lanxa kunjalo sibonile ukuthi uMaNdlovu, unina kaNkosiphile kamthembi umnawakhe ukuthi uyakwena kuhle lokho. Lokuthi uNkosiphile ulokhe ekhangelwa nguNothando nje kungenxa kaKhumalo ohlezi ekhuza uMaNdlovu ukuthi engacabangeli umntaka nina izinto ezingalunganga. Ngoba esekhulakhulile uNkosi usesukile ewosteli kaMaTshuma njengokutshengisa kwethu kuviki ephelileyo. Usehlala kuwostela kaDlamini.
Lapha batshelwa ukuthi njengoba sebengamajaha aqotshwana, sokumele izifundo zabo lazo zithuthuke zihambelane lebanga asebekilo. UDlamini ubatshela ukuthi abantu asebekhulile abatshoneli ukudlala ibhola kodwa bayasebenza. Esitsho njalo uDlamini uthola impendulo angayilindele ivela kuMbonisi umngane kaNkosiphile. Uphendula ngalamazwi uMbonisi:
“Manje thina asikakhuli. Singabantwana. Asifuni kusebenza thina. Kumnandi ukudlala”. Imphatha kubi impendulo kaMbonisi uDlamini laye aphendule ngamagama amabi. “Wena Mbonisi! Ngivele ngiyazi ukuthi ikhanda lakho libolile. Thula ngingakakufaki inhlanekela.” UNkosiphile laye uyangenela kudaba lolo ethi kalibolanga ikhanda likaMbonisi. Uthi nxa libolile kungani linganuki? Ubuza lokuthi uDlamini kanti umzondelani uMbonisi? Iyamcaphula njalo linkulumo kaNkosiphile uDlamini emtshela ukuthi angabi yimbulu.
Ukusebenzisa amagama njengokuthi amakhanda abolile labobumbulu lanxa kungamelanga uDlamini awasebenzise atshengisa ukuthi usethukuthele. Impendulo zikaMbonisi loNkosiphile angazi ukuthi benziwa yikuthi bayiziyelele kumbe njalo baqondile ukukhuluma lomuntu omdala ngalindlela? Ngombono wami ngibona angathi ibala elithi ukusebenza abalizwisisi. Nxa elandisa uNkosiphile uthi wadla inja uDlamini kodwa yena engayiboni into emzondisayo.
UDlamini wabatshela ukuthi kusukela ngalelolanga babezafundiswa ukuzendlulela imibheda yabo.
Babezafundiswa lokuthanyela bakorobhe phansi endlini. Ekhuluma labafundi labo babethule zwi okwaze kwamkhathaza futhi uDlamini wabuza ukuthi ukhuluma lezigodo yini? UMbonisi waphendula emtshela ukuthi babesesaba njengoba wayethe uzabatshaya njalo wayethe amakhanda abo abolile.
UDlamini njengomuntu ojayele ukukhulisa abantwana wathi wayezisomela wabuza uMbonisi ukuthi babengabantu abanjani abangasonyiswayo? Wabaphephisa abantwana uDlamini kodwa eqinisa ukuthi wayelethemba ukuthi babezwile ukuthi basebezafundiswa imisetshenzanyana ababethemba ukuthi izabaphathisa empilweni. Esetshonjalo uDlamini uNkosiphile waphendula ethi bazwile kodwa babezahola yini? Kwamcunula njalo uDlamini ukuzwa into enjalo wathi:
“Uyimbulu, Nkosiphile. Ngithi ungabi yimbulu. Ayisimi engathi uzalwe unje. Siyona ngokulifundisa imisebebenzi ezanceda lina labemuli zenu? A! Fuseki mani!” Ungabona sekusetshenziswa amagama anje kuyabe sekuliwa sibili. Kodwa kangikutsho ukuthi kasomabala afanele ukusetshenziswa emphakathi lakuphephandaba likaZulu. Kwakungamela ukuthi uDlamini azonde aze afike kusibanga sokuthuka abafundi laba ngamagama anje. Waqhubeka ethethisa uMbonisi ngenhlamba efanayo lapho ayebuze khona ukuthi umthethiselani uNkosiphile.
UMbonisi wayethe usezonda uDlamini ngesenzo leso. UDlamini wathembisa ukuvuthela uMbonisi ngempama ebathembisa ukuthi babezahlikihla kuye. UNkosiphile ngobuntwana uthi uzacebela uDlamini kunina ekhaya uzamlungisa. Wala ukuthi basebenzele amahala ethi yena ekhaya engasala egcine amatsinyane kanina uphiwa imbasela yamazambane.
