uMthunywa
Silo C Dube kugwalo
NGEVIKI ephelileyo uNkosiphile, (uNkosi), ubesethulela udaba lwakhe ngesikhathi efunda eSir Humphrey Gibbs. Walile nxa unina omncane uNothando emcela ukuthi ake ahambe laye endlini yakhe njengoba kuyimpelaviki ethi ufuna ukusala lomngane wakhe uMbonisi. Uthi engahamba lonina omncane uMbonisi uzasala elesizungu.
Nxa unina omncane uNothando ethi uzahamba labo bobabili uNkosi uthi uMbonisi kasoze avume ngoba unina wamalisa lokhu ethi angabohamba esidla emzini. UNothando uyibona kuyimfundiso enhle leyo ahle avume ukuthi uhlakaniphile uMbonisi, umngane kaNkosi, ahle athi ufuna ukuthi uNkosi laye enze njengoMbonisi angahambi esidla emizizini angayaziyo.
Sesiside isikhathi uNkosi wahamba wayafunda ebhoda esikolo seSir Humphrey Gibbs abazali bakhe bengazake bayembona. UNothando lanxa wayehamba ayembona uNkosi kazake abazise abazali bakhe. Lokhu kukhanya sekusenza unina uMaNdlovu engahlaliseki. Sihlangana lamuhla uMaNdlovu eloKhumalo ngekhaya, uMaNdlovu lokhe ewisa iphika okungapheliyo okwenza uKhumalo aze abuze ukuthi kungabe kutheni?
Nxa uMaNdlovu evala ngokuthi akulalutho, uKhumalo uma ngelokuthi umangoye uyasola. Ucina ebhoboka uMaNdlovu nxa uKhumalo ephikelela ukuthi kukhona okumhluphayo. Uthi sekunsuku ntathu engaquthi ubuthongo ekhumbula ngoNkosi.
Uthi nxa ethi uyalala, uphupha embona elunywa zinyosi umntanakhe ngakho-ke uyesaba. UKhumalo utshengisa ukungakholwa emaphutsheni etshele uMaNdlovu ukuthi iphupho liphupho. Uyabuza kuMaNdlovu ukuthi ngubani owathi ngaso sonke isikhathi amaphupho anyanisekile esitsho ukuthi aliqiniso.
UKhumalo ufundisa uMaNdlovu ngamaphupho ukuthi ngesinye isikhathi siphupha ngezinto esiyabe sicabanga ngazo. Wathi akulalutho olubi ngoNkosi. Ngabe kukhona okukhona, aluba wayesebazisile uNothando. UMaNdlovu utshengisa ukungamthembi umnawakhe uNothando.
Uthi, “Yena wuphi Nothando wakhona lowo? Nansi isisiyaphela ithemu silokhu samtshiyela umntwana kodwa lokuthi asibhalele nje kodwa lokhu esitshele ngokuthi umntwana wasala njani, mpu! Manje ngumuntu ongamethemba yena lowo?”
Lokhu kumangalisa uKhumalo aze abize uMaNdlovu ngebizo lakhe lokuzalwa embuza ukuthi kambe yinto angayitsho ngomnawakhe leyo? Wamkhumbuza ukuthi uNothando wabancedisa kakhulu ekudingeni indawo kaNkosi. Wabuza ukuthi kambe lamuhla wayesengaphenduka abe mubi njani? UKhumalo watshengisa ukumethemba uNothando ethi uleqiniso lokuba wayehlala esiyambona umntwana yikho wayesithi akulalutho olubi ngoNkosi.
UMaNdovu ukhulumela eceleni lapho ethi aluba ulemali wayezagada ngelilandelayo ayembona. UKhumalo wamkhumbuza ukuthi wayetshilo nje ukuthi izikolo zasezizavalwa wayesezabuya umfana. Wathi ukuthi uMaNdlovu agade ngokusayo kuphinde ngensukwana ezilandelayo kugade omunye kwakuyabe kuyikudlalisa imali. Watshela uMaNdlovu ukuthi alinde zivalwe abesegada-ke ayemthatha umntwana.
Uqhubeka etshila inkulumo uMaNdlovu ethi kuyisono ukuthi umuntu aswele imali ethi yena. UKhumalo iyamnenga linkulumo kaMaNdlovu emtshela ukuthi usebheda ngoba ekwazi kuhle ukuthi lapho ekhaya labo imali ngeyabo bobabili. Wavuma ukuthi uMaNdlovu angatsho ukuthi imali ngeyakhe ngoba kunguye ohlatshelwe isithupha.
Wamfundisa ukuthi laye uMaNdlovu unjengoqhatshiweyo ngoba utshonela imisebenzi yangekhaya obekungamele iqhatshelwe isisebenzi. Waphetha ngokuthi ngaleyondlela bubili babo baqatshiwe.
Kungenjalo, laye wayengancitshwa ukudla nguMaNdlovu ngoba isikhathi esinengi kusetshenzwa nguye yedwa.
La ngamazwi aqakathekileyo okokuthi abantu bebengathola isifundo esiqakathekileyo kuwo.
