uMthunywa
Silo C Dube kugwalo
UNKOSI simethulelwe njengomntwana ohlakaniphileyo kakhulu kunguye osixoxela ngempilo yakhe.
Siyakhumbula bafundi ukuthi usixoxele ngobulima babanye abantwana abafunda laye esikolo seSir Humphrey Gibbs. Usitshelile uNkosi ukuthi kulabanye abalenxwala ezingejayelekanga abanye njalo bayafunda ukuzenzela izinto. Usitshelile uNkosi ukuba balesineke omama ababafundisayo ngoba bengazondeli abanye ukuthi bayehluleka.
UNkosi nxa elandisa ngempilo yakhe yeSir Humprey Gibbs kukhanya yena esenelisa ukubamba masinyane izinto abazifundiswayo. Uyilandisa kuhle indaba yakhe okwenza obalayo aphose athandabuze ukuthi uNkosi ulobuyelele. Okumphambanisayo njengoba besibala kuviki ephelileyo yikuphicwa yizibongo zabazali bakhe.
Kunzima kuNkosi ukwehlukanisa amabala “uyihlo” lo “nyoko”.
Wenza njengabantwana abanengi labanye abantu abadala abathi nxa kusetshenziswa la amabala bathola angathi bathukiwe. UNkosi uyaveza ukuthi kakwazi ukuthi umama ngunyoko. Unina omncane laye wancenga uNkosi ukuthi atshele abanye isibongo sakhe wabhoboka sethe ngowakoKhumalo ethatha isibongo sikayise laye. Lokhu kwakumehlula ngoba uyise uKhumalo wayezamile ukumfundisa ukuthi isibongo sakhe laye uNkosi ngesakoKhumalo.
Wayemtshelile futhi uKhumalo ukuthi isibongo sikanina lesikanina omncane uNothando sasingesakoNdlovu. Esekhunjuzwe ngunina omncane ukuthi abonge ngesibongo sikaNakaDu wabonga uNkosi ethi, “ENdlovu!”
Kwakumthethe isikhathi eside uNkosi ukuthi akuzwisise lokho. Sebebodwa lonina omncane uNkosi esebuzwe ukuthi wayehleli kuhle yini, wavuleka uNkosi wamxoxela ngakho konke ababekwenza lapho kunye labangane bakhe.
Wamtshela njalo unina omncane ukuthi abangane bakhe babe ngahlekisi ngaye njengaboVikinduku ekhaya.
Wamxoxela ngokudla okumnandi ababekudla. Uyakucokisa ukudla kwalesisikolo uNkosi ngoba ukhanya ekubuka kokuphela lapho akhuluma ngakho khona. Waxoxela unina omncane uNkosi ukuthi zingavalwa izikolo wayefuna ukuyabaxoxela ukuthi wayekholisa labangane bakhe lapho. Wayebuhlungu uNkosi ngoVikinduku owayehlala emthuka ngobulima bakhe. Uthi wayezamtshela ukuthi lapho esikolo sabo eSir Humprey Gibbs akuvunyelwa ukuthethisa abanye lokuhlekisa ngabo.
Wathi bona lapho abavunyelwa ukukhuluma inhlamba. Njalo wagcizelela ukuthi wayesefunde okunengi.
Unina omncane embuza ukuthi wayesefunde okunengi okunjengani waphendula wathi, ukuzigqokela lokuzihambela yedwa esambuzi. Wathi wayezabona engafika endlini yakhe unina omncane. Wathi usezenzela konke lokho kodwa abanye bakhe bayehluleka. Unina omncane wathi wayezathokoza unina kaNosi ukuzwa lokho njalo wathi uyathaba nxa efunda kuhle njalo lokuthi uyasithanda isikolo sakhe.
Unina omncane watshela uNkosi ukuthi wayezamcela ukuba bahambe bonke edlini ethi usemkhanuka njalo ethi wayezamletha ngoMvulo ekuseni. UNkosi yena wathi wayezahamba lonina omncane bengavala izikolo.
Wathi kathandi ukutshiya umngane wakhe uMbonisi ngoba wayezasala elesizungu. Unina omncane wathi kwakungahluphi lokho ngoba wayezamcela laye uMbonisi ukuthi bahambe laye. UNkosi wathi wayengasoze avume uMbonisi ngoba unina wayethe engahambi esidla emzini.
Wakuthanda ukuzwa lokho uNothando, unina omncane kaNkosi ethi uhlakaniphile uNkosi, wagcizelela ethi ufuna laye uNkosi enze okufana lalokho okwenziwa nguMbonisi angahambi esidla emzini angayaziyo.
