uMthunywa
Silo C Dube kugwalo
NGILETHEMBA liwuphendule kuhle umbuzo engiliphe wona ngeviki ephelileyo omayelana lokukholwa lokungakholwa kukaSwabide Khumalo. Imibuzo enjengale liyiphendula ngokusekela ngobufakazi obuvela ogwalweni. Ungeze wathi uKhumalo unje ungasekelanga umbono wakho ngokusegwalweni. Ngike ngathinta kancane ukuthi umfana oqhatshiweyo lapha koKhumalo, uVikinduku laye usengohlanganyela labanye abafana bathuke uNkosi ngobulima bakhe.
Umlobi walolugwalo umphile uNkosi laye ithuba lokuthi aveze imizwa yakhe. Izalukazi oMaKhuphe lomuyi uMaNsingo baphosa benza iphutha elikhulu ekubelethweni kukaNkosi lapho ababekhuthaza ukuthi kedluliswe uNkosi ngoba ezelwe eyisilima esesabekayo. Babethi yinto engaqedakaliyo okokuthi ngesiko lakudala asebefisa lidilizwe, lichithwe lingasalandelwa, kwakumele ahle aklinywe uNkosi kodwa nangu usekhulile usesenelisa ukwenza imisebenzi ethile eyenziwa ngabanye enjengokwelusa.
Nxa uVikinduku emthethisa uNkosi ethi uyisilima, uNkosi umelana laye ethi: “Ungithethiselani? Angiguli.
Angisosilima.” Lanxa ebambela muva izinto uNkosi ngumuntu ophilayo olemizwa okokuthi uzwa ubuhlungu nxa ethethiswa. UVikinduku kalazwelo ngoba nxa uNkosi ephikisa ethi kasosilima yena, umkhumbuza ngamanye amazwi amabi akhulunywe nguBhusumani othe uNkosi ulamehlo aphikisanayo njengawonwabu.
UNkosi utshela uVikinduku ukuthi yena loBhusumani bahlala bemhleka, yena kafuni kuhlekwa.
UVikinduku yena uthi yikuthi uNkosi akhule. Uqhubeka ethi unina kaNkosi uyamtotoza, ethi uzakhula eyisithutha esingaziyo lalapho esathutha khona. UNkosi uthi uzamcebela kunina kodwa uVikinduku uthi uzakuba yisithutha sendoda engazejayeza ukuhlala eceba kunina. Uthi uNkosi kahlikihle abeyindoda. UNkosi waqina ngokuthi wayezamtshela kuphela unina lanxa uVikinduku wayezama ukumvala ngamazwi ayengathi uyamqinisa, amfundisa impilo.
Amazwi kaVikinduku loba ayengathi afundisa uNkosi impilo yabafana egangeni belusile ukuthi bangadedesi ayebukhali ehlaba imizwa kaNkosi yena ababemthatha njengesiyelele esingela mizwa. UNkosi laye njengomuntu ophilayo uthi inhliziyo yakhe yayisitshisa vutha. Uqhubeka ethi zasezihlengezela inyembezi.
Wamzondisa ngamandla uVikinduku uNkosi ngamazwi alandelayo: “Khala nxa ufuna kodwa ungangicebela kunyoko angithethise kumbe angincitshe ukudla ngizakulungisa kusasa emangweni. Lizabumbeka ngcono ngempama ikhanjana lakho lelo eliyisizemazema.”
Yabamba inkulumo phakathi kukaNkosi loVikinduku. UVikinduku waqhubeka elokhu ethethisa uNkosi, yena elokhu ethi uzamceba kuphela. UVikinduku yena wayesethusela uNkosi ukuthi engamcebela athethiswe njalo ancitshwe lokudla wayezamtshaya ngakusasa. Lokho yikho ukuthuliswa abafana abahlukuluzwa ekweluseni bathule kodwa baqhubeke behlukuluzwa egangeni. UNkosi wakwala lokho.
Okwamangalisa uNkosi yikuthi uVikinduku wayethi nxa kulabadala kumbe oDubani bekhona wayesenza angani uyamthanda. UNkosi umchaza njengokuthi wathi eqala ukuvuleka amehlo wamthatha njengomnewabo kodwa owayesetshona encedisana labafana bemzini ukuhlekisa ngaye. Ngikuvezile ngeviki ephelileyo ukuthi uNkosi esecebile kunina uMaNdlovu, wathukuthela kakhulu uMaNdlovu. Wabiza uVikinduku ngelomgodoyi embuza ukuthi wayezamani ngokutshona behleka uNkosi.
Wayesebenzisa ilungelo lakhe njengonina womntwana uMaNdlovu ukuphalimvu nxa esizwa ukuthi uVikinduku labangane bakhe batshona behlekisana ngengane yakhe ekweluseni. Ngakwelinye icele uKhumalo yena wakutshaya indiva lokho okokuthi oVikinduku babephatha uNkosi ngochuku ekweluseni yena wathetha esekela uVikinduku njengoba wayesenza umsebenzi omkhulu wokwelusa ethi uVikinduku engahamba babezazelusa bona inkomo.
