Ayihlabi Ngakumisa

15 Nov, 2018 - 00:11 0 Views

uMthunywa

C Dube

UNKOSIPHILE uthe ezalwa bekulokwesaba ukuthi yisilima esingaphezulu.

Siyakhumbula ogogo uMaNsingo loMaKhuphe bethi kalubulawe usane lolo ngokomkhuba wakudala okwakuthi kungazalwa umntwana olobulima kuhle kuthiwe adluliswe.

Babelecebo lelo ogogo labaya kodwa unina womntwana uMaNdlovu wakwala lokho walindela ukuthi ezwe ukuthi umyeni wakhe wayezathini ngalokho.

Wakhululeka uMaNdlovu lapho esizwa ukuthi wayezaphila umntwana uNkosi.

Siyakhumbula ukuthi lanxa wayetshonjalo uKhumalo kwamthatha isikhathi ukuthi amemukele uNkosi.

Kwakungathi umntwana uNkosi ngokaMaNdlovu yedwa. Wayengamphathi umntwana.

UMaNdlovu kwabangathi usentolongweni ngoba kwathiwa angaphumi phandle lomntwana ukuze engabonwa ngabantu.

Abantwana labo kwathiwa bengatsheli muntu ukuthi unina ulosane lokuthi wayengaphi.

Yayingasayi enkonzweni imuli kaKhumalo okwamangalisa ibandla.

Ngilethemba abafundi basakhumbula ukuthi uKhumalo wazama ngamandla akhe wonke ukuthi amdlulise umntwana lapho aze ayedinga inyanga uMahaqaza yamupha umuthi ukuthi afike athunqisele imuli yakhe yonke. Lapho kwakuthenjwa ukuthi uNkosi wayezahitshwa ahle afe.

UMaNdlovu ebona izenzo zomyeni wakhe uKhumalo waqina ngamandla emthandazweni ecela iNkosi yakhe uNkulunkulu ukuthi imsize lengane yakhe.

UKhumalo lokho ayekunxwanele ethi umuthi kaMahaqaza uzamdlulisa uNkosi akusenzakalanga.

Loba waphatheka kubi uNkosi ngomuthi lowo wakhwehlelisa kabuhlungu kodwa waphila.

UKhumalo wayeqonqoselwe nguMahaqaza ukuthi nxa ehlulekile ukumbulala uNkosi kwakungasamelanga azame njalo.

Wathi lanxa eseye kwenye inyanga uBharimasoso isithi ingamdlulisa uNkosi, uKhumalo wayesephambukile kulowo mqondo esesaba ukuthi amadlozi akibo angamhlamukela ambulale yena.

Yikho lokho okwenza uNkosi waphila.

Nguye lo uNkosi unina omncane uNothando owafika epulazini lapho ababegcina khona inkukhu ethi baphathwa njengezigqili ngoba bengavunyelwa ukuya emakhaya ngamaholideyi.

Wathi kwenziwa lokho ngoba oNkosi kuthiwa balengqondo ezingaphelelanga.

Kodwa isimanga yikuthi sizwa ekhulunyelwa uNkosi kodwa yena wenza izimanga ngoba konke akwenzayo kuyaphumelela kusenza ukuthi abantu bamangale ukuthi pho ubulima bakhe bungaphi.

Njengabantu bonke uNkosi eqala ukufunda engekhaya wayesehluleka izinto ezinjengokuzisiza, kodwa kwenela ukuthi asale loyise uKhumalo esala lokuthunywa, wamtshaya uKhumalo wabaleka elandela unina umfana wahle waguquka waqala ukuzenzela izinto ezithile.

Efika lesikolo simbonile uNkosi ehleka abanye ababesehluleka lokuzendlulela imibheda yabo ngoba yena wayesenza ngcono kulabanye abafundi.

Lanxa wayeke atshengise ukubambela izifundo khatshana uNkosi kodwa ngokulotshwa kogwalo uphose ungaze wabubona ubulima bukaNkosi.

UNothando wayelombono wakhe ukuthi aluba isikolo saboNkosi singathi bayeqhubeka ngomsebenzi wabo besemakhaya.

UTshili uyamcebisa uNothando ethi ukuthi abantwana bayavala bahambe emakhaya kumbe hatshi, kuya ngomsebenzi abawufundelayo. Wathi umntanakhe uNkosi ufundela ukufuya inkukhu zenyama.

Wathi kuyadingeka-ke ukuthi ahlale ekhona ukuze zigcineke kuhle inkukhu zakhe.

Waqhubeka uTshili ethi bubili babo labobafana babezaphetha bezingcitshi kulowo msebenzi.

UNothando yena uqina ngokuthi kwalani ukuthi baye nakekela inkukhu zabonina beqhuba leyomfundo?

Wathi labo abaqhatshe abantu bokusala bekhangele lezo ezabo ngamaholideyi.

UTshili ubuza uNothando ukuthi imali yokuholisa labobantu ivele ngaphi?

UNothando esethukuthele uthi angithi liyazithengisa inkukhu lezo, ebuza ukuthi pho bayisa ngaphi leyo mali njengoba abantwababo bengabaholisi?

Wathi kabathathe lona leloholo ebelifanele abagcini balezonkhukhu baphe labo abazasala besebenza inkukhu zabo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds