uMthunywa
C Dube
Kuviki ephelileyo sitshiye uKhumalo etshengisa ukuthi yena ukholwa entweni zesintu.
Ukholwa ukuthi abantu bayathakatha. Ukholwa ukuthi umuntu isintu sakhe kasideli lanxa sekutheni.
Ukusekele lokhu ngokuthi lamakholwa imizi yawo imile kanje, yizikhonkwane kuphela. Uqhubekele phambili esithi leyabafundisi imbala.
Lokhu ukuqinise ngokuthi yikho kuyakuzwakale kuthiwa umfundisi othile uyala ukutshintshelwa kwenye indawo.
UKhumalo uthi lokhu kubangelwa yikuthi umfundisi lowo usuka azenze osejayelane kakhulu lebandla lakhe angabe esafuna ukuntshintshwa, kanti manga, wesaba ukufulathela isikhonkwane sakhe esimphilisayo.
UKhumalo ulenkolelo yokuthi abantu bonke, kugoqela abafundisi, baphiliswa yizikhonkwane emzini yabo.
Liqiniso yini lokhu, kumbe uKhumalo uzama ukusekela inkolelo zakhe ngokuninda abantu bonke laba ngodaka?
Ngenye indlela uyakuthandabuza ukukholwa okupheleleyo kubafundisi ngoba yena embaxambili, nganxanye uyakholwa kuNkulunkulu kodwa ale elokhu ebambelele ezintweni zesintu njengoba lapha wayesezisola ukuthi wayelibele ukulungiselela kuhle usuku lwakusasa.
Usuku lwedili likaNkosi lokuthakazelela ukuphumelela kwakhe ezifundweni.
Ngokungalungiseleli ngokupheleleyo ngesintu sakhe, uKhumalo wayebona okungabathakathi kuzasina kuqakezelana.
UKhumalo yena ubona kufanele umuzi uvikelwe kubathakathi nxa kuzaba ledili elinjalo ngoba kuzangena wonke umuntu kunye labathakathi.
Lanxa kunjalo kukhanya uKhumalo walithola lelothuba lokuthi enze okuthile okwakuzasuthisa umoya wakhe njengomuntu owayesephakathi kokudana ngokulibala ukulungiselela lolosuku ngokuvikela umuzi wakhe kubathakathi.
Ngokulandisa kukaNkosi uthi uyise wathi lasala selitshisela elangeSonto esevuke kudala. Wathatha imfuko yakhe waqonda ekhitshini wafika wavukutha amanzi ngenkezo.
Waphuma wayaqutha eceleni komnyango. Wawabiza ngamagama wonke amathongo akwabo awaziyo.
Wawacela ukuthi abikele lawo angaphambili. Ukuze kucace sibili ukuthi uKhumalo ukholwa esintwini, uNkosi usitshela ukuthi uKhumalo uthi wawabikela ngomsebenzi owawuzakwenziwa mhlalokho.
Ekhuluma esenzenjalo, kuthiwa uKhumalo uthi waye ephethe echitha igwayi.
Ekucineni kuthiwa uthi wakhaphazela amanzi phansi kathathu enathisa amadlozi.
Esenze kanje kuthiwa wazizwa eselesibindi uKhumalo.
Kuthiwa wayesesazi ukuba umsebenzi uzakhokhelwa ngabaniniwo.
Sasesingalandela-ke isiKrestu, athabe uMaNdlovu, unina kaNkosi.
Kusobala ukuthi wayengasethembi isiKrestu somkakhe uKhumalo nxa engafakanga isintu sakhe.
UNkosi uyasilandisela ukuthi laqala ilanga ledili lakhe, liqala ngenkonzo eyayikhokhelwa nguNdiweni.
Sekuphele inkonzo uNkosi uthi kwalandela izikhulumi. Utitsha Nkomo lo owayefundisa ngaphansi kukaKhumalo kuthiwa nguye owavula umsebenzi.
UNkomo lo sizamkhumbula ukuthi nguye lowaya owahlekisa ngoNkosi ethi kuzelwe isilima koKhumalo. Zwana kuviki ezayo inkulumo yakhe.
