uMthunywa
Thando Dube
NXA sokuyisikhathi sobusika inengi labalimi liyathikaza ukulima amatamatisi ngoba lisesaba ukuthi azatshazwa ikanti zikhona indlela zokuthi umlimi awavikele amatamatisi akhe avuthwe amnike inzuzo njengakwezinye izigaba zomnyaka.
Ekhuluma loMthunywa uNkosikazi Gladys Ngwenya ongumlimi esabelweni seMatabeleland South, eGwanda uveze ukuthi zikhona indlela zokuvikela amatamatisi ekutshazweni.
“Zinengi indlela zokuvikela amatamatisi ekutshazweni. Indlela yokuqala etshiphileyo njalo elula ukwenziwa ngeyokufaka izigubhu zamanzi zama-two litres esivandeni samatamatisi.
“Amanzi la asezigubhini ayancedisa ukubamba umqando ongahlasela isilimo, umqando uthi usiyafika ematamatisini ungasela mandla okutshaza,” kutsho uNkkz Ngwenya.
UNkkz Ngwenya uqhubekele phambili wathi ukwakhela isilimo uthango kuyavimba ukuthi sitshazwe.
“Enye indlela evamileyo yikuthi umlimi enze uthango olude kusiyaphezulu okungaba ngamamitha amabili ngotshani kumbe ngamapulasitiki eceleni eliphakemeyo lesivande sakhe. Lokhu kuyavikela ukuthi umoya olomqando ungafinyeleli ematamatisini.
“Okunye okungenziwa ngumlimi yikuhlakulela amatamatisi akhe. Umhlabathi ongelakhula uyabamba isikhudumezi njalo ebusuku nxa sokuqanda uyakhipha leso sikhudumezi okuzenza ukuthi isilimo singatshazwa,” kuchaza uNkkz Ngwenya.
UMnumzana Thabani Mlotshwa laye ongumlimi ugcizelele wathi ukuthelela kancane emadabukakusa kuyenza umqando ungahlaseli isilimo.
“Ukuthelela nge-sprinkler emadabukakusa kwenza umoya uhlale ulamanzi. Lokhu kuyehlisa ukutshazwa kakhulu kwesilimo.
“Umlimi kwesinye isikhathi sengatshisa amavili kumbe i-oil lokunye nje okungasebenziyo emadabukakusa ukuze angezelele ukukhudumala emoyeni. Le indlela nxa eyenza kufanele ananzelele ukuthi kacini etshise iganga.
“Ngalezi indlela umlimi sengavikela izilimo zakhe ekutshazweni,” kuphetha uMnu Mlotshwa.
