Asithuthukiseni ulimi lwethu

16 Aug, 2018 - 00:08 0 Views

uMthunywa

SIYAQHUBEKA ngokunanzelela ulimi lwethu lwesintu kanye lemvelaphi yenkulumo thize ezisetshenziswa kulimi lwethu lwesiNdebele. Sisananzelela izaga zolimi lwesiNdebele. Ngeviki edluleyo besixoxa ngempawu zezaga; olunye uphawu lwesaga yikuthi isaga asiguquki. Isimo sesaga asiguquki okuyikuthi awungeke wengeze kumbe ukhiphe amabala thize emutshweni wesaga.

Indlela esabunjwa ngayo yiyo indlela yakhona esihlala sikuyo. Lapho sisetshenziswa sande ukuthi sithi, abadala bathi isina muva liyabukwa kumbe sithi amaNdebele athi umqokolo wendwangu uvuthelwa esiswini.

Olunye uphawu esilunanzelelayo yikuthi isaga sona vele siligabazi lokukhuluma, lowo olaleleyo uyabe eyizwa inkulumo yesaga iyileyo epheleleyo, njalo ihlabusa okwamagama njalo kuyileyo egcwele ubugabazi: isibonelo sobugazi benkulumo, akuladlozi ladela kwabo laya emzini.

Olunye uphawu njalo lwesaga yikuthi isaga silombiko othile oyisicebiso kumbe isixwayiso kulabo abalaleleyo njengokuthi ukubona kanye yikubona kabili. Okunye njalo ngezaga zesiNdebele yikuthi azibhalwanga njengamanoveli esiwabalayo kodwa ziyaziwa, zihlala ebantwini yikho nje zingena lazo ngaphansi kwemibhalo engalotshwanga.

Izaga ziyatshiyelwana ngesizukulwana ngesizukulwana. Kodwa-ke kulezinsuku siyananzelela ukuthi seziqokelelwa engwalweni thize okuyona ndlela yokutshiyelana ngezizukulwana ngezizukulwana njengoba sinanzelela ukuthi abatsha bakulezi nsuku kabaselathuba elide belabantu abadala abazi ulimi kabanzi, ulimi lolu selufundwa engwalweni thize.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds