uMthunywa
SIYAQHUBEKA ngemihlobo etshiyeneyo yezifenqo zenkulumo okuyindlela yokunonisa ulimi lwethu.
Sikhangele umhlobo obizwa kuthiwa yisiqathaniso.Inkulumo yesiqathaniso yinkulumo ezwakala sengathi ilokuziphikisa kodwa yona igcizelela okuthile kulokho okuyabe kukhulunywa ngakho njalo siyabe sesikubona kwengezelelwe sesikubona sikuzwisisa ngesisindo esizwayo.
Kesikhangele izibonelo ezithile, uyise akatshayi uyabulala. Nxa sikhangela inkulumo le kukhanya sengathi siyalandula ukuthi uyise lo uyatshaya kodwa besesinanzelela ukuthi utshaya ngendlela ephezulu sesikhokhelwa libala elithi uyabulala, esinye isibonelo ngesithi lamuhla akutshi nje kuyavutha. Kusengathi siyakulandula ukutshisa lokhu kodwa besesibona nje ukuthi kutshisa kakhulu nxa sekuvezwa ukuvutha.
Kesikhangele ukubhuqa. Nxa sibhuqa sikhuluma sengathi leyonto okukhulunywa ngayo siyayibuka kodwa nje kusobala ukuthi siyayisola. Yindlela nje yokuhleka sicatshile kungazange kuthi bhaa egcekeni. Kesikhangele izibonelo: uThemba ayisibuhle nje ngamakhala amakhulu angazani zimbenge zotshwala. Sibona sengathi kulobuhle obuthile obubukwayo kodwa sibone nje ukuthi kuyahlekwa sibili.
Lanxa umuntu ehleka kwenza lalowo ohlekwayo laye angaze angananzelela lula ukuhlekwa kwakhe, kusuka kufike nje sekuthundubele.Ukusitheka kwenkulumo efana lale kuyehlisa nje lokuxabana kwabantu lapho bengeke bathule ukuhlekwa kwabo kuthe bhadla. Esinye isibonelo ngesithi, thina sifundiswa lugodogodo lombalisi ongangabathwa.
