uMthunywa
SILO OPHEZULU STINTA
Silokhu siqhubekela phambili sikhumbuzana ngendlela yesintu yokubiza kumbe ukukhangela isikhathi. Yindlela nje echaza ubunono bolimi lwethu lwesintu, kumnandi kanganani lalapho silusebenzisa ekubhaleni indaba zethu zokuzibumbela.
Wavuka kusesempondo zankomo, . . . kwathi kukhala inkukhu zokuqala esengaphetsheya komfula. . .
i) Isikhathi sibalwa njengenyanga.
Inyanga zomnyaka siyazazi ngesintu ngakho kuqakathekile ukuzazi ngokulandelana kwazo, zona-ke zazibalwa ngokuthwasa kwenyanga ekhanyisayo.
Abantu babethola ithuba lokuthi ulutho bazalwenza kumbe lwenzakala ngasiphi isikhathi kuleyo nyanga.
Inyanga yinye ngayinye yayibalwa kanje:
a) Ukuthwasa kwayo — Lapho ibonakala entshonalanga incinyane kungathwa ilensuku ezingaka ithwasile
b) Inyanga isihlangene — Lapha inyanga iyabe isihlangene yonke ingaseyilo ucezu.
c) Inyanga isiphuma -Lapha inyanga ibonakala ilanga lisanda kutshona.
d) Inyanga isiselwa — Lapha-ke kutshiwo isikhathi okusa inyanga ilokhu ingakatshoni, ize itshone ilanga seliphumile.
e) Inyanga isisiya ekufeni — Yisikhathi lapho okuthi kusisa khona inyanga ikhona iphuma empumalanga. Lapha-ke inyanga iyabe isifuna ukuficana lelanga iphuma.
f) Ekufeni kwenyanga — Lapha kutshiwo lolosuku lapho ecina khona ukubonakala.
g) Ngelimnyama — Lapha-ke zinsuku ezimnyama tshu! Kungela nyanga.
Konke lokhu kuphawula ukuthi inyanga ithwasa ize iyekufa, isintu silayo indlela yokwehlukanisa izikhathi
