uMthunywa
Silo Ophezulu Stinta
Ngeviki edlulileyo besixoxisana ngemibala yenkomo lapha esikunanzeleleyo yikuthi imibala yakhona kayibizwa lula nje njengemibala esiyijayeleyo esingathi ebomvu, emhlophe kodwa zibizwa ngendlela yazo lapho silandela kumbe sichaza ngayo imibala esiyejayeleyo. Sisaqhubeka ngayo imibala yenkomo.
xii) Indume/indumekazi yinkomo elamachathachatha amhlophe ebusweni kodwa angamanengi
xiii) Ingcotsha/ingcotshakazi yinkomo elebala elincuncu elimhlotshana elehlayo ebusweni
xiv) Inhlamvukazi le yinkomo ensikazi ebomvu
xv) Inkone/inkonekazi umbala lo uthathelwa enyamazaneni okuthiwa yinkone. Inkomo yakhona ibomvu kumbe imnyama ibe lamabala amhlophe ahamba axuba abomvu kumbe amnyama
xvi) Insundu/Insundukazi inkomo le ibomvu ilamabala ayibubende
xvii) Intusi/intusikazi le yinkomo ebomvu elebala elimhlophe ekhwapheni kumbe elimhlophe ngaphansi
xviii) Intshe yinkomo ebomvu kumbe emnyama emzimbeni ibe isigamanxisa ubuhlophe emangqineni
xix) Inzotho/inzothokazi inkomo le ifuna ukuba yibubende kodwa ububomvu bayo buthubile
xx) Iwasa/ iwasakazi yinkomo elamabala amnyama lamhlophe ahamba esithi gqa gqa.