Asithuthukiseni ulimi lwethu

15 Nov, 2018 - 00:11 0 Views
Asithuthukiseni ulimi lwethu

uMthunywa

SISAQHUBEKA ngokulandelela imbali yezaga zethu. Lokhu sikhangela umhlobo wezaga ezimbaxambaxa. Sithathe isaga esithi, kakumbethe waphika lelanga. Isaga lesi siyindlela yokuxwayisa indlela yokukhuza umntwana izikhathi ezinengi ukuthi kuqakathekile ukuthi athobele omdala, angaze amisana laye.

Umbethe ngamazolo avuka embese utshani kuthi ngokuphuma kwelanga lawo mazolo ayancibilika akhithikele phansi.

Isaga lesi sivelela lapho-ke ngemva kokuthi abadala benanzelele ukuziphatha kombethe sekuphume ilanga.

Sithathe isaga esithi indlebe yisifebe, ngesintu isifebe ngumuntu wesifazana ongaziphathanga, ongazi ukuzikhuza nxa sekubuya ekuthandaneni labesilisa.

Umuntu onjalo uyabe engaboni ulutho olubi ngitsho lapho.

Kuyafana-ke lendlebe, iyezwa into yonke ekhulunywayo kanye lalokho okungayifanelanga, indlebe kayikwazi ukuthi ikhethe ukuthi ilalele kumbe ingalaleli, yenza njengaso-ke isifebe esingakhethi silisa.

Sithathe isibonelo esithi umendo kawuthunyelwa gundwane.

Emendweni kunzima, kakulula ngakho kudingeka isibindi kanye lokubekezela.

Izolo ke abadala bebephendlela abantwababo indawo yokuhlala bedingisisa bacwayisise ngomuzi lapho umntanabo ayezakwendela khona.

Konke lokhu kwakusenzelwa ukuthi umntwana ahlale kuhle.

Impilo-ke inzima loba kwakungacwayisiswa kanjani kukhona okukodwa okwakusala umntwana aze azibonele ngawakhe esesemendweni kungasela kubuyela emuva.

Kulapho-ke okwakungena khona indaba yegundwane ukuthi aluba lalithunyelwa ukuze liyehlola.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds