uMthunywa
SILOKHU siphakathi kwendaba yethu lapho esilandelela khona imvelaphi yezaga zesintu. Silokhu sikhangela izaga ezithathelwa ebantwini.
Singalibali ukuthi izaga lezi ziyafundisa njalo ziyisibuko sempilo ikakhulu sinanzelela impilo yekadeni.
Kesithathe isaga esithi, zala abantu ziyebantwini. Ngokwempilo vele umuntu uphila labantu, ngeke nje aze aphile lezinyamazana.
Izolo bekunanzelelwa ukukhonjiswa kwentombi ngesaga lesi ukuthi lapho ebingathandi khona yayisala itshiye idlulele phambili.
Lowo jaha owaliwayo-ke wayeziduduza ngaso isaga lesi ukuthi loba nje wayesaliwa kodwa-ke wayezadlulela phambili ayevuma omunye umuntu ofana laye hatshi ukuthi ayogana inyamazana.
Sibuye sithathe isibonelo sesaga esithi sona, umntwana ongakhaliyo ufela embelekweni.
Izolo umntwana ubebhajulwa ngunina ngembeleko ayibophe okuzwayo ukuze enelise ukuqhubeka ngemisebenzi yangekhaya njengoba imisebenzi yangekhaya ibivele iqondana labomama.
Kwakuthi lapho umntwana ethule eqolo umama abe lamadlabuzane okusebenza okuzwayo ngokufisa ukuphutshisa indima ethile.
Umntwana ongakhaliyo-ke wayengabulawa layindlala eqolo lapha unina elokhu esithi uthule nje.
Kodwa lowo ohlaba umkhosi wayezinceda ngoba kwakusenza ukuthi unina ake amehlise akhangele ukuthi ngabe wayekhathazwa yini nxa eselambile aphiwe lokudla.
Siyatsho lasebantwini abakhulileyo ukuthi nxa umuntu elohlupho kakumelanga athule nje afe lalo kodwa kakhale kwabanye bamsize.
