Asithuthukiseni ulimi lwethu

06 Sep, 2018 - 00:09 0 Views

uMthunywa

SISAQHUBEKA lemihlobo yezaga ezitshiyeneyo. Ngeviki edluleyo sike sakhangela izibonelo ezithile ngaphansi komhlobo wezaga ezithathelwa ezintweni ezimilayo. Kesithathe njalo esinye isibonelo, esithi okuvuthiweyo kubolile.

Isaga lesi sithathelwa esihlahleni sezithelo ngolwazi esilalo isithelo saloba yisiphi isihlahla esingasicabanga, nxa izithelo zakhona zivuthwa zihle zivuthwe kanye kanye okokuthi ngobunengi ziyabola ngoba labantu besehluleka ukuzidla bahle baziqede.

Isaga lesi-ke siyisicebiso ebantwini ukuthi banike abantu ukudla bazidlele ngoba labanikazi ngeke bakuqede bodwa, sikhuthaza nje ngokunikana ngokudla, ukuthi abantu bangancitshani ngolutho abangacina sebeluchitha selunuka kumbe selonakele, ikakhulu emibuthanweni ethile lapho okuyabe kuphekwe ukudla kwaba kunengi.

Ngokulandela izaga lezi siyananzelela ukuthi zichaza impilo yabantu zivelela empilweni yabantu, yikho nje sizithola ngaphansi kwemibhalo engalotshwanga. Abantu babehlangana lezehlakalo ezitshiyeneyo njalo bebona izinto ezinengi empilweni ababezifanisa lokuphila kwabo, yikho nje zazitshiyelwana njalo zisengaqhubeka zidalwa kusiya ngezinto kanye lezehlakalo ezitshiyeneyo abantu abaphila kizo.

Sibuye njalo sithathe isibonelo sesaga esithi sona sewasika imizi. Izolo bekungelula ukutshela umuntu ukuthi uzibani wabhubha. Ngakho kwakuyimpendulo yabadala nxa kubuzwa ngumuntu owabhubhayo.

Babesithi waya sika imizi. Imizi le yayihanjelwa sibili umango omude kanye lensuku ikakhulu ngabantu besifazana. Abantwana-ke babehlala ethembeni lokuthi uzibani bani wayasika imizi aze abe lengqondo eqedisisayo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds