uMthunywa
Phumulani Mpofu
KULELIVIKI ngixoxisane loSihle Dube ohlala eNtabazinduna. USihle ngumama oleminyaka engamatshumi amathathu, wayehlalisene loThemba Moyo. Laba bobabili babusiswa ngengane ezine belokhe behlalisene kungelahlupho olukhona. Kodwa-ke ekuzalweni kukaNtokozo yena owazalelwa esibhedlela seMpilo ngomnyaka ka2013 izinto zaqala ukuphenduka, akwaziwa ukuthi kwangena moya bani koMoyo.
Ngokulandisa kukaSihle, uMoyo waqala ukumbeka umlandu wokukhupha imali ebhanga ayisebenzise kungela kuvumelana phakathi kwabo bobabili. Lokhu-ke kwaletha ingxabano phakathi kwezithandani lezi kwaze kwabafikisa emapholiseni.
Abomthetho bayiphenya lindaba, bathi kakuthathwe incwadi ezitshengisa ukukhutshwa kwemali ebhanga (bank statements), ngokwenza njalo kwatholakala ukuthi uMaDube wetheswa icala angalaziyo.Ngokuthukuthela uSihle wamangalela uMoyo ngokumhlukumeza ayemenze khona emva kokuthi baye emapholiseni. Wavalelwa uMoyo okweviki entolongweni, ekuphumeni kwakhe waphuma elenzondo enkulu wahle wathi kakube yikuphela kothando lwakhe loSihle. Ebona ukuthi kwakungaphezu kwamandla akhe uMaDube wemukela indaba ezibuhlungu kodwa-ke waba lesicelo sinye nje zwi, ukuthi kabayethathisa umntwana incwadi yokuzalwa.
UMoyo wakubona kulithuba elihle lokuphindisela. Kunje nje ngumuntu ongafuni lutho olumhlanganisa lomama wabantwabakhe. Izihlobo zakhe sezize zasubuka amadolo zincenga ukuthi kacabangele ikusasa lomntwana. UMoyo wenza lesisihluku ecabanga ukuthi ujezisa umama womntwana, kodwa-ke umntanakhe nguye ohlangana lobunzima empilweni nxa engelayo incwadi yokuzalwa. Incwadi yokuzalwa iyafuneka nxa umntwana engena isikolo, iyafuneka nxa umntwana emele angene emncintiswaneni eyenziwa esikolo, ekubhaleni imihloliso, ekuthatheni isithupha nxa sefikile ezingeni lokuthi athathe isithupha ngokusemthethweni.
Sekukanengi ngihlala ngibona iphutha elifanayo elenziwa ngobaba bengananzeleli ukuthi bancindezela ikusasa labantwana.Kuthi lapho izinto sezonakele besebegeza ezabo izandla, bakhombe omama ngeminwe.
Ukungathathisi umntwana incwadi yokuzalwa akujezisi umama womntwana kodwa kuncindezela ikusasa lomntwana, yikho-nje ngixwayisa abazali bonke nje ukuthi lingenzi iphutha lokungathathisi abantwana incwadi zokuzalwa lisithi lijezisa omama.
Umlobi utholakala kunombolo zocingo ezithi 0773195055 lakukheli ethi [email protected] lakuFacebook page ethi Trinity Project PVO kanye lakuwebsite.
