uMthunywa
YiNtatheli kaMthunywa
LONYAKA kukhanya umdlalo ozakuba lodumo ngowe-Pool, nanko sekulamathimu amatsha abangisa ukungena kumaligi angaphansi kweBulawayo Pool Association.
UDonald Wadawu obona ngezokukhitshwa kwembiko kuBPA uthe kulisizini kuzafiwa.
Amaqembu asebhalise ukudlala kuligi kaDivision 1 ngaphansi kwenhlanganiso yeBPA yiWoza Woza, iMunyoro Snipers, Mantshalini Tshabalala leBMC.
IWoza ngeyelokitshi leMakhandeni ikanti iMunyoro ngeye Nketa.
“Asemanengi amathimu afuna ukudlala. Siyakubongela lokhu ngoba kutshengisa ukuba umdlalo wethu uyakhula koBulawayo.
“Sesiqalisile ukulungiselela isizini njalo sithanda ukwazisa abadlali kuBulawayo Pool League ukuba labo balungiselele. Ngiyakutshela imncintiswano yalisizini izahlabusa,” kutsho uWadawu.
UWadawu ubike ukuba amathimu amatsha azancediswa ngokufindiswa imithetho yomdlalo lezinqumo zenhlanganiso yeBPA andubana baqale ukudlala.
