. . . Umntwana usengafela ukungaloboli kukayise

Amasiko yiwo asenza saziwe njalo sibe lomehluko leminye imihlobo. Ngokuqhuba amasiko ngendlela ezehlukeneyo siba lomehluko. Okufana lokuthi esiNdebeleni, kukalutshwane ukuthi uxhawule abantu izandla emfeni kodwa okwejwayelikeleyo yikuthi nxa umuntu engumfazi uyafika aguqe lapho okubuthane khona abantu athi “sesihlangana ngenhlupho” kukanti esiShoneni bayaxhawula abantu emfeni.

Lokhu kuveza ukuthi loba sonke singabantu abansundu amasiko ethu ayatshiyana. Loba nje izikhathi sezitshintshile, lamasiko esengani asetshabalala, kodwa uyawabona evuka esima ngenyawo zombili nxa umntwana engazalwa, nxa kulotsholiswa kumbe nxa kungaba lemfa.

Nxa umntwana engakazalwa uyezwa amadoda esexoxisana labomkabo ukuthi kungangcono bayekhululekela ngakibo, ukwenzela ukuthi umamazala amncedise amfundise ukuthi umntwana unakekelwa njani. Nxa kulesehlakalo yikho ofunda khona amasiko akini anjengokuthi vele umkhwenyana uphathwa njani njalo ucolwa njani, njalo sekutheni.

Nxa kuyikuthi ilunga lemuli kalisekho/selibhubhile yikho obona khona ukuthi nxa kulemfa kwenziwa njani, amadoda awalali endlini, omama balala behlabela.

Kukanti abanye nxa bengcwaba bayaphosela inhlabathi egodini abanye bona baphosa amatshe nxa kuyikuthi sebengcwabile. Isiko esengilibone lihlupha kulawo wonke ngelamalobolo. Lokhu ngikutsho ngokuthi amalobolo yiwo aveza ukuthi umuzi wabantu ababili uzakwakhiwa njani.

Nxa kuyikuthi amalobolo akhitshiwe lomkhwenyana uyaziwa ekhaya, kuba lula ukuthi lanxa umntwana esezalwa intombi iyebelethela ngakibo, umkakhe engasabi lutho.

Kuyafana lokuthi nxa umkhwenyana wayengalobolanga nxa kuyikuthi umkakhe ufele ngakibo abangakibo sebengamngcwaba bengamtshelanga umkhwenyana ngoba besithi kabamazi. Kukanti abanye abalolunya nxa kuyikuthi ufele kumkakhe sebengakhalala ukumngcwaba bethi kamudle ngoba nguye ombuleleyo kumbe bamethusele bethi engavele amngcwabe bengekho uzazibonela.

Okuzwisa ubuhlungu yikuthi nxa sekuthe kwaba ngumnyama abazali bonke sebethe bafa sekusele abantwana, izihlobo ziyadonselana, abasuke bahlupheke ngabantwana ngoba phela bayabe sebephakathi kwelitshe lembokodo.

Ngoba phela bengathi baya kuzihlobo zikanina bayatshelwa ukuthi abayekhulumisana lezihlobo zakoyise zizokhipha amalobolo bengakakhulumi  okunengi. Kuba lusizi nxa kuyikuthi abazali babhubha abantwana besesebancane bengazazi lezihlobo ukuthi zingaphi.

Kuliviki ngithole ithuba lokuxoxisana lamajaha akoMadamombe amabili, uPrince loGift. UPrince onguye omdala uthi abazali bakhe babhubha yena eleminyaka eyisikhombisa umnawakhe uGift eleminyaka emibili.

Kwaqala kwabhubha unina kwathi ngemva komnyaka uyise laye walandela. Bakhula besondliwa nguyisemkhulu ozala uyise laye ongasekho  emhlabeni.

UGift nxa elandisa udaba lolu uthi uyisemkhulu wayekhuluma ngokuthi kwakumele ayekhipha amalobolo kanina oseleminyaka eminengi wabhubha ukuze abangakibo babanike incwadi yokufa kwakhe ukwenzela ukuthi ukhulu wabo enelise ukuyabathathela incwadi zokuzalwa.

UGift uchaza ukuthi uyisemkhulu wayengeke enelise ukuthi ayekhipha amalobolo ngoba laye wayengumyanga elenkomo ezine ababezisebenzisa ukulima ukuthi labo benelise ukuthola okuya ethunjini.

Okuzwisa abantwana laba ubuhlungu yikuthi sebefela icala likayise lokungaloboli, ngoba phela wehluleka lokubhala imihloliso yakhe ye O-Level ngoba engelancwadi yokuzalwa.

Kenelisi lokuthi athole umsebenzi ngoba kalasithupha, kenelisi lokuthatha iphasipoti ayehlala lomnewabo eGoli. Ukungaloboli okwenziwa nguyise sekutshabalalise impilo yakhe ngoba phela kwakungekho angakwenza ngaphandle kokulima ekhaya, loba engaze athathe umfazi, abe labantwana bayathatha isibongo sikanina ngoba yena kalamaphepha.

Njengenhlanganiso sacela inombolo zezihlobo zikanina ukwenzela ukuthi sizame ukukhulumisana labo ukuthi bancedise uGift ngencwadi yokuzalwa ukwenzela ukuthi laye azame ukwenza into engcono ngempilo yakhe.

Ngithanda ukuthi ngikhuthaze abazali ukuthi kungabangcono ligwebe abayibo abadala  icala hatshi ukuthi size sijezise labantwababo. Ngoba phela abantwana bona bayabe bengela cala, babengekho abazali bethandana, njalo abacelanga abazali babo ukuthi babalethe emhlabeni.

Asincedeni intandane ukuze lazo zibe lekusasa engcono.
Asihlanganeni ngeviki elizayo

Umlobi uthinteka kukheli ethi [email protected]; Laku nombolo ezithi 0773 195 055/ 09 881508