uMthunywa
UMLINGISI womdlalo wakuMzansi Magic, iThe Queen, uThemba Ndaba odlala indawo kaBrutus Khoza uthi, akalandaba lezitabane, uqhuba nje umsebenzi wakhe.
Lokhu kulandela iziqephu zakhe eziphuma kulezinsuku lapho evela engafuni lokuyizwa eyokuthi indodana yakhe uBhekumuzi iyisitabane, ithandana loPrince (Moshe Ndiki).
UBrutus ungundabamlonyeni kulezi zinsuku kubathandi beThe Queen njengoba eze wakhomba indodana yakhe ngesibhamu ngoba ecasulwa yikuthi iyisitabane.
Ebuzwa ngendawo ayidlalayo uThemba uthe kubalulekile ukuthi umlingisi enze ucwaningo ngendawo ayidlalayo ukuze enze abantu bayikholwe.
“Uma ngilingisa, ngiveza umlandu walowo muntu, izinto azithandayo langazithandiyo. Kubalulekile ukuveza izinto akholwa kuzo.
“Ngakho uma ngilingisa kumele leyo ndawo engiyidlalayo ngiyiveze kuhle.
“Angilamizwa ngendawo engiyidlalayo, ngisuke ngiveza okwenzekayo emphakathini,” kutsho uThemba.
Uthe kuyamangaza ukuthi abantu abanengi bayazifela ngoBrutus kusukela kubantu abatsha kusiya kumaxhegu lezalukazi.
Ebuzwa ngokuthi akesabi yini ukuthi uBrutus ugqugquzela inzondo lokuhlukunyezwa kwezitabane uthe:
“Umsebenzi womlingisi yikuveza indlela abanye abantu abacabanga ngayo.
“Kuliqiniso ukuthi kulabantu abasacabangisa okukaBrutus, ngakho umlingisi kumele aveze ubunjalo babo ngaphandle kokwesaba.
“Lokhu kufana lokuthi uma umuntu edlala indawo kamalugaju akuchazi ukuthi kuzokwanda omalugaju kodwa kuzoveza uhlobo oluthile lukamalugaju,” kutsho uThemba.
Uqhube wathi yena ngesingaye uyaziqhelelanisa lokucwasa ngobuhlanga, ngobulili kanye lenzondo ebhekiswe kwabanye abantu.
“UNkulunkulu usithanda sonke, ngakho akekho okumele azibone engcono kulomunye,” kutsho yena.
Kuzokhumbuleka ukuthi phambilini uThemba uke walingisa indawo yesitabane emdlalweni wamahlaya kuSABC1, iStreaks eminyakeni eyedlule.
Ebuzwa ngalokhu uthe uma enikezwe indawo yokuthi ayidlale wenza isiqiniseko sokuthi uyilingisa ngendlela, abantu baze bacabange ukuthi ngumuntu wangempela.
Uthe kuyamsiza ukuthi adlale izindawo zabantu abahlukeneyo ngoba kutshengisa ithalenta lakhe njengomlingisi.
