uMthunywa
Gladmore Ncube loArnold Ndlovu
SITHWELE amalahle ekhanda isalukazi esihlala koBulawayo ngemva kokugconwa ngabazukulu baso bethi siyaloya.
UMthunywa uzwe ukuthi uNkosazana Regina Ndlovu kahlalisananga kuhle lemuli yakhe nanko phela umzukulu wakhe uThulani Ndlovu uthi ugogo wakhe ngumthakathi omkhulu osemqedele abantwabakhe ebadla.
Uyise kaNkszn Ndlovu wafa kodwa katshiyanga iwili ngakho imuli ibanga indlu ayitshiya eMakokoba yikho nje sebekhombana ngophakathi betshelana ubuthakathi.
Ekhuluma lentatheli uNkszn Ndlovu uthe uhlupho lwaqalwa nguThulani oyalela endlini owayitshiyelwa nguyise.
“UMnu Ndlovu nguye oluhlupho, uhlala egijimela emaphephandabeni yena ekwazi ukuthi ukungazwani okukhona phakathi kwethu kwaqalwa nguye. Indlu le ngekababa ngakho ke yena uMnu Ndlovu kalamvumo yokuhlala kiyo, angifuni ukumbona ehlala kiyo ngifuna aphume,” kutsho uNkszn Ndlovu
Intatheli iphinde yakhulumisana lomakhelwene ongathandanga ukubethwa ngegama othe uNkszn Regina ubabukekelisa ibhayisikopo yamahala ngoba indaba le uhamba eyifakaza isitalada sonke ukuthi bathi ungumthakathi.
“Sesikhathele ngebhayisikopo esiyibukiswa ngumuntu omdala ongango Nkszn Ndlovu. Zikhathi zonke nxa besilwa loMnu Ndlovu uyaphuma endlini egijimela ukuyakuma emgwaqweni eyihulula inhlamba. Ukucina kwakhe ukubuya lapha wafika watshaya wabulala amafasitela ethu ngoba sizame ukubalamula njengabomakhelwane,” kuchaza umfakazi lo.
Iphephandaba liphinde lakhuluma loMnu Thulani Ndlovu othe kasoze aphume endlini ngoba kuyindlu yemuli hatshi eka Nkszn Ndlovu.
“UNkszn Ndlovu kazange angikhulise, indaba yokuthi wayengibhadalela imali zesikolo akusiqiniso ngamanga ngoba ngafundiswa ngama-scholarships. Indlu engihlala kiyo ngeye muli esayitshiyelwa ngukhulu wami okutsho ukuthi yena kalalungelo lokungixotsha kumele ayehlala emendweni hatshi ukubangisa abazukulu indlu yomdeni.” kuphetha uMnu Ndlovu.
