uMthunywa
YiNtatheli kaMthunywa
UMDLALI othenjiweyo kumvimbi zeqembu lamaWarriors uTeenage Hadebe ubike ngokuzethemba ukuthi iqembu lakhe lizafika kuma-final omqhudelwano weAfcon ngomnyaka ozayo.
AmaWarriors angene uhambo olude esiya ezweni leLiberia ukuyaqedisa umkhankaso wenkezo yeAfcon yomnyaka ka2019 lapho iqembu lakuleli elizaphatheka khona.
“Lo ngumdlalo okumele siwunqobe ukuze siyefika kuAfcon. Sizadlala sisazi ukuthi siphethe amaphupho esizwe,” kutsho uHadebe.
Umdlalo lo uzaqhutshwa ngeSonto njalo umqeqetshi uSunday Chidzambwa ulakho ukuba nguye yedwa umqeqetshi ozancintisa iqembu lakhe lingazange linqotshwe kuyo yonke imidlalo kusigaba sokudinga indawo yokufika kuma-final.
UChidzambwa ubika ukuthi ulesiqiniseko sokuthi amazwe abaqala ukudlala lawo ku-Afcon, nxa iZimbabwe ingaphumelela awasoze alibona kulumqhudelwano.
“Ukunqoba iLiberia kuzakutsho ukuba sesingenile kuma-final eAfcon, loba sisasele lomdlalo owodwa,” kubika lumqeqetshi esebulenjini, andubana ahlangane leqembu emangweni wokuya eLiberia kuliviki.
“Abadlali batshelwe ukuthi bazame ukunqoba. ILiberia izafuna ukusitshengisela ukuthi ayisithimu encinyane.Sihamba sisazi konke lokhu. Asizitshayi isifuba kodwa sizimisele.”
UChidzambwa uthe leli lithuba lamaWarriors lokuthi abezingqwele zenguqu yeAfrica.
“Iphupho engilalo yikuthi sizayiphakamisa inkezo yeAfcon. Kungabe kuzwakala kuliphupho nje kodwa siyethemba ukuthi sizamangalisa, iZimbabwe ibonakale kumazwe alenguqu yaphezulu eAfrica.
Nanti iqembu likaChidzambwa elizadlala leLiberia ngeSonto:
Onozinti: George Chigova (Polokwane City), Edmore Sibanda (Witbank Spurs), Simbarashe Chinani (Dynamos).
Imvimbi: Alec Mudimu (CEFN Druids), Ronald Pfumbidzai (Bloemfontein Celtic), Teenage Hadebe (Kaizer Chiefs), Kevin Moyo (FC Platinum), Marshall Munetsi (Orlando Pirates).
Abasesiswini: Willard Katsande (Kaizer Chiefs), Tafadzwa Kutinyu (Azam), Ovidy Karuru (Amazulu), Talent Chawapihwa (Baroka), Marvelous Nakamba (Club Brugge), Khama Billiat (Kaizer Chiefs), Knowledge Musona (Anderlecht), Rodwell Chinyengetere (FC Platinum).
Abagadli: Evans Rusike (SuperSport United), Knox Mutizwa (Lamontville Golden Arrows), Tinotenda Kadewere (Le Havre AC).
