uMthunywa
Charity Moyo
BEKUNGABIZWA ozwayo esikolo seMagwegwe High School ngeviki ephelileyo kumkhosi wokuthakazelela iCulture Week.
Lumkhosi uqhutshwe ngaphansi kwendikimba ethi, “Celebrating Art and Culture Preneurship lapho abafundi bezikolo ezitshiyeneyo ze-Primary kanye le-Secondary akade bethe gwaqa khona.
Bekuhaywa izinkondlo, kugiywa, kusenziwa lemidlalo ebijonge ukufundisa ngamasiko lemikhuba yesintu.
Kumkhosi lo intsha ifundiswe ngokuqakatheka kwamasiko kanye lokuthi ayini.
Amasiko avezwe njengendlela abantu abaphila ngayo, lokhu kugoqela izembatho, ukudla lakho konke okusempilweni yabansundu.
Omkhulu kwezemfundo kuMzilikazi District, uMnumzana Elphanos Ndlovu uveze ukuthi ilanga lokuthakazelela amasiko kumele lilondolozwe nguye wonke umntwana wakuleli ngoba kulilanga eliqakathekileyo.
Uthe abantu abansundu kumele balandele ngokugcweleyo amasiko abo andubana anike ababalisi inqobe yokuthi kungumlandu wabo ukuthi bafundise abafundi ngamasiko ukuze angabhidliki.
“Kumele siziqhenye ngobuyithi bethu, konke esikwenzayo kakube lamasiko ethu phakathi ukuze angatshabalali, kuthi ababalisi bona balomlandu wokufundisa intsha ngawo ukuze isizwe sethu singatshabalali ngoba phela yibo abakhokheli bethu bakusasa,” utsho uMnu Ndlovu.
Wengezelele wathi nxa kulemikhosi efana lale abantu bonke beAfrica abakhuluma indimi ezitshiyeneyo kumele babambane ukuze kube lokuthula.
Ukugcwaliseka kwelanga leli kuvele ngokugcweleyo ngesikhathi abafundi beNkanyezi Primary sebegida umgido wesitshikitsha. Bephethe impahla eyayisetshenziswa endulo egoqela ingiga, imgigo, izitsha kanye lokunye okutshiyeneyo.
Omunye umfundi weMagwegwe, uAlfred Muchapondwa uhaye inkondlo ephathelane lokuqakatheka kwamasiko.
Kunkondlo yakhe elesihloko esithi, “Halala Africa” utshengise ukuthi amasiko ayini njalo aqakatheke njani kwabasakhulayo. Inkondlo le iveze isifundo esikhulu sokuthi abantu bangahugwa yisiLungu kodwa balandele amasiko abokhokho ukuze isizwe sakithi singatshabalali.
Umcimbi lo uphethe lapho abafundi
abatshiyeneyo sebevunule ngendlela imihlobo yabantu abansundu abavunula ngayo abagoqela amaShona, Tswana, Zulu, Xhosa, Venda labo bonke abantu bakusizwekazi seAfrica.
