uMthunywa
Nkosilathi Sibanda
NGEMPELAVIKI kukhangelelwe ukuthi amaqembu amabili akuleli iHighlanders leDynamos angene umango eqonde kweleBotswana kumqhudelwano we-Joy Super Power Cup olomvuzo wemali.
Amathimu la, ngokutsho kwabaqoqi benkezo, azancintisana lamathimu amabili eBotswana iTaffic United leMochodi Centre Chiefs.
Kumidlalo yakuqala iBosso iphiwe iTaffic, abafana beDeMbare bazadibana leyinye. Amaqembu eZimbabwe athathele phezulu ukunxuswa kulinkezo kukhangelelwe ukuthi abadlali bathole imali. Umdlali munye ngamunye uthenjiswe i5 000 Pula yokufika kumidlalo le.
Kumbiko evele kumqoqi wemidlalo uJoy Setshedi oweJoy Foundation, imali yabadlali ikhona.
“Njengokutsho kwami akumelanga sikhalaze ngemali ngoba yonke ithimu izayithola,” kutsho uSetshedi izolo.
Ukudlala eBotswana kutsho ukuba umdlalo weBosso leTsholotsho usuyedluliselwe phambili. IDynamos bekumele idlale leHow Mine koBulawayo.
Imidlalo le kuzamele amaqembu akuleli ayiqinele ukuze abadlali baphenduke ekhaya bebambile. Enkambeni yeBosso kulobuhlungu obuhlabe iqembu kulandela ukungenzi kuhle kumidlalo edluleyo.
Umqeqetshi wayo uErol Akbay usemehlweni yabalandeli beqembu, abasafuna ukukholwa ukuthi uyenelisa ukukhuza abafana.
Umqeqetshi lo kusegcekeni ukuthi usephelelwa ngumphako kwezenguqu.
Kweminye imidlalo, iligi yeCastle Lager ingena kuviki lamatshumi amabili lambili. Ezibanga ukukhokhela ingalane iChicken Inn inxuswe yiBlack Rhinos kuthi iNgezi Platinum izavula inkundla yeNational Sports Stadium ilande iCaps United.
Imidlalo yeCastle Lager kulimpelaviki:
NgoMgqibelo: Yadah v Chapungu (Morris Depot), Black Rhinos v Chicken Inn (Rufaro). Bulawayo City v Harare City ( Barbourfields),
NgeSonto: Caps United v Ngezi Platinum (National Sports Stadium), Hwange v Bantu Rovers (Colliery), Triangle v FC Platinum (Gibbo), Shabanie v ZPC Kariba Maglas Stadium, How Mine vs Dynamos (Yedluliselwe phambili), Highlanders vs Tsholotsho (Yedluliselwe phambili).
