uMthunywa
YiNtatheli kaMthunywa
ZISELE zitshwaqe umzimba izakhamizi zelokitshini leMagwegwe koBulawayo ngemva kokutholakala kosane olusanda kubelethwa lumbokothiwe emfuleni wengcekeza andubana amapholisa athwale isidumbu ngebhokisi lamafutha besiya enkambeni.
Isiga lesi senzakale ngeviki ephelileyo lapho abantwana abathe bevula ugebhezi lukamabonakude obeluphoswe lapho okugeleza khona ingcekeza babona usane andubana babikele abadala abahle babiza amapholisa.
Ekhuluma lentatheli omunye wezakhamizi uMnumzana Ben Moyo uveze ukuba isenzo lesi sibi kakhulu.
“Mina ngidlule ekuseni lapha kulabantwana bengitshengisa ukuthi emfuleni lapha kulomuntu ngathi ngiyakhangela ngabona ngumntwana omncane ongaba leviki ezelwe.
“Indawo lapho abefakwe khona sichapha nsukuzonke kodwa besingamboni uze wabonwa ngokungabafanyana obekuzidlalela.
“Ngibona angathi unina ebeka lapho wayezitshela ukuthi uzahamba lamanzi kanti ngitsho, uzabonakala. Lesi yisihluku esiphindiweyo ukulahla umuntu, aluba nje wamusa esibhedlela bayamgcina,” kubika uMnu Moyo.
UMthunywa uphinde waxhumana lomunye obekhona umntwana lo ekhitshwa emanzini ngamapholisa uMnumzana Cebisiwe Ndlovu oveze ukuba amapholisa kumele enze konke okudingakalayo ukuthi abambe umuntu owenza lokhu.
“Umuntu owenze isihluku lesi kumele abanjwe avalelwe. Akumelanga uzithwale ungakwazi ukuthi umntwana uzamgcina ngani.
“Usane lolu lukhanya selukhulile okokuthi lwake lwabelethwa lwagcinwa okweviki umuntu wathi eselubulala walutshiya emanzini engcekeza ukuthi luhambe lamanzi.
“Amapholisa ngiyawasola kakhulu, lokhu kwabikwa ekuseni bona baze bafika lapho ntambama ukuthi kuyini okwakubaphuzisa akwaziwa. Okunye okwangizwisa ubuhlungu yikuthi bathi bezokhipha usane lolu babengabuyanga lebhokisi lesidumbu baze badobha ikhadibhokisi lamafutha balufaka phakathi bathwala angathi bathwele inyamazana. Abakwenzayo ayisibo buntu ngitsho,” kubika uMnu Ndovu.
Uqhubekele phambili eveza ukuba abantu kababambane ukulahlwa kwabantwana kuphele.
“Umphakathi kumele usebenze ndawonye okokudojwa kwabantwana befile kuphele, hatshi lokhu ukuthi kuphelele emoyeni. Abantu basabalalisa izindaba zezingozi zemigwaqo lezokudutshulwa kwezokuhanjiswa kwemibiko betshiya olwabantwana lolu. Ngabe kwakungokunye lwaluzagcwala kubomakhalekhukhwini bethatha imifanekiso befaka lakuWhatsApp laboFacebook.
“Aluba lwasabalaliswa bekuzancedisa ukuthi owenza lokhu abanjwe afundiswe isifundo. Abalolwazi kumbe abalomuntu owayezithwele bambona isisu singasekho engelamntwana bazise amapholisa aseduze labo,” kuchaza uMnu Ndlovu.
Iphephandaba likazulu likhulumisane lesikhulumi samapholisa akoBulawayo uInspector Precious Simango . . . . . .
