uMthunywa
Nomthandazo Ndlovu
ZIBUKELE ibhayisikopo yamahala izakhamizi zesigabeni seTshokotshoko eBeitbridge amanina amabili edlephana samangoye lenja kubangwa uBen 10.
Lindaba etshiye izakhamizi zesigabeni lesi zibulawa zimbambo njalo ziphelelwe yenzakale kuviki ephelileyo lapho amanina angonakazibani uNkosikazi Sindisiwe Dube lo Nkosazana Sithandazile Ncube abakhwincelane khona iziketi kwaba luthuli lwaze lwavala ilanga bebanga uBrian Siziba.
Ekhuluma loMthunywa uNkosazana Pamela Ndlovu uthe abakubone ngalelolanga esibholaneni kubamangalisile ngoba omunye wala amanina wendile.
“Besithelela imibhida nje esivandeni abanye besikha amanzi siloMaDube, kwathutsha uMaNcube laye ethwele umgqomo engumuntu ozokukha amanzi, khonokho nje sezwa esithi kuMaDube ungabodlalela endaweni zabanye abantu wena ulokwakho,” kuqhuba uNkszn Ndlovu.
UNkszn Ndlovu uqhubekele phambili wathi lokhu kwadala ukungazwisisani phakathi kwalaba ababili njalo kwatshengisa lokuthi uMaDube uyakwazi ukuthi kukhulunywa ngani ngoba baqala ukuthethisana lapho.
“Baqala bethethisana kungani bayadlala sabekela sezwa ngempama uMaDube setshaye uMaNcube esithi angabomdelela kasontanga yakhe, yikho okusuke khona izibhakela lapho lathi sibayekele ngoba besikwazi ukuthi babangani sathi kungcono sibekele balungise udaba lwabo lokuthandana lomntwana,” kutsho uNkszn Ndlovu.
Esinye njalo isakhamuzi uNkosikazi Thabiso Moyo owayekhona kusenzakala lokhu uthe ngeke baphinde bakukhohlwe futhi.
“Mina omama balapha bayangimangalisa sibili, kulabobaba lapha abangathathanga kodwa bagijimela abantwana, yebo balemali kibo kamfana lo kodwa laye into aseyenza ayilunganga kalande intanga yakhe.
“UMaDube wasuka sedatshukelwe yibhulawuzi izikopela sezisele esibholaneni, kungasibo obaba ababeseduze abalamulayo sasizabekela babhuqane kambe abantu abadala shuwa besenza ihlazo elinje,” kutsho uNkkz Moyo.
Ebuzwa ngodaba lolu uMaNcube uthe yena ubelwela ijaha lakhe alithathelwe nguMaDube yena engumuntu oyendileyo.
“Mina bengilwela okungokwami, umama lo ugangile uthandana labantwana abancane yena elendoda, uBhara yintanga yami abantu bona babona ingani ngimdala kulaye akusiqiniso lokho njalo angikathathwa mina,” kutsho uMaNcube.
Imizamo yokukhulumisana loMaDube yehlule ngoba ubengadobhi ucingo lwakhe.
