uMthunywa
BAPHILA ndawonye labafileyo njalo abalandaba lakho.
“Asizikhethelanga impilo le, kodwa leli sokulikhaya lethu,” kutsho uKgosi Tshila (38) indoda engela khaya ehlala emangcwabeni eBrixton, eGoli.
“Lapha sizama ukuziphilisa ngakho nxa ekhona ongakujabuleliyo lokhu kuzamele asitholele indawo yokuhlala,” kubika uKgosi.
Amangcwaba la asesaziwa ngokuba yindawo yalabo abathatha izidakamizwa kanye lalabo abangela zindawo zokuhlala.
UKgosi ubikele iphephandaba le-Daily Sun ukuthi ukulala phezu kwamangcwaba kuyakhudumala loba nje kusesabisa kulokuyalala ezitaladeni.
“Kwesinye isikhathi siyake sibone izinto ezinjengezipoko kodwa akula esingakwenza ngoba asilawo amakhaya ngakho sesize sikujwayele esikubonayo,” kutsho uKgosi.
Uqhubekele phambili echaza ukuthi amangcwaba la avame njalo ukusetshenziswa ngomahotsha.
“Abantu balokwenza ezocansi phambi kwethu, sibukele kungela lutho esingalwenza.”
Abadlula ngasemangcwabeni labo balokubona labobantu bethatha izidakamizwa ngapha behlezi phezu kwamangcwaba.
Izikhamizi zeBrixton zithi inkinga le sebaba layo okwesikhathi eside njalo kungathi lokhe iqhela.
Bathi njalo kade babikela amapholisa loludaba kodwa akulalutho oselwenziwayo.
UMnumzana Emmanuel Radebe (33) uthi lababantu abalayo inhlonipho yabafileyo.
“Loba ngilakho ukubazwela lokhu kuvele akulunganga ngoba baphambanisa ukuthula kwamadlozi ethu,” kuchaza uMnu Radebe.
Ubuye njalo watshela iphephandaba likazulu ukuthi izakhamizi lazo zikhathazekile ngokwenzeka kumadlozi akibo.
“Ngizenza njani amasiko akithi engcwabeni likakhokho wami nxa kulomuntu oselenze indawo yokuhlala,” nguMnu Radebe lo.
‘‘Idolobho le Jo’burg kumele libone okungenziwa ngaloludaba ngoba lokhe luqhela ukwedlula labo abangelamakhaya abahlala khona,” kuphetha okaRadebe.
