uMthunywa
Gladmore Ncube
AMATHIMU azaphatheka kumidlalo yabasakhulayo ebizwa ngokuthi Zimbabwe National Youth Games sekhuthazwe kuthi akhuphe imali ukuze iphathise ukuthi imidlalo le iphumelele.
Abaqoqa imidlalo le lonyaka bakhala ngokuthi amathimu la awasebenzisani labo kuhle ayaphuza ukukhipha i$30 ebhadalwa yithimu inye ngayinye ukuze benelise ukuphiwa ithuba lokudlala. Ngaphandle kokuthi kukhitshwe imali le, akula midlalo ezaqhutshwa.
Kuyaziwa ukuba ama-youth games asebenzisa imali le ngakho ukukhitshwa kwayo kubalulekile ngoba yikho okuwavumela ukuthi aqhubekele phambili.
Ekhuluma loMthunywa ngoLwesibili, umaqhuzu weqembu eliqoqa imidlalo le uBurzil Dube ubike ngokudabuka okhulu ukuthi bavalelwa phandle ngezinye izabelo.
“Izabelo azifuni ukukhipha imali yokudlala. Imali le esikhuluma ngayo yiyo esetshenziswa ukuhlanganisa okuthile okumayelana lama-youth games. Kuvele kuhlalwa kusenziwa njalo ukuthi zonke izabelo zibhadale i50 phesenti yalimali andubana kuqalwe imidlalo.
“Isikhalazo sethu ngesokuthi sesibiselwa emuva yimali le. Sicela izabelo zibhadale bakithi ukuze sinikeze abantwana imidlalo emihle,” kutsho uDube.
Isicelo sikaDube silethwe njalo ngumphathintambo wezemidlalo uMakhosini Hlongwane kumaviki amabili adluleyo owathi imali iyinsika ukuze imidlalo iqhutshwe kuhle.
Ugatsha lwezemidlalo olweSports and Recreation Commission luphose umbiko wokuthi izabelo zibhadale ngokuphangisa.
Isikhulumi se-SRC uTirivashe Nehweyembwa wazise iphephandaba likazulu ukuba bazakhulumisana lenkokheli zezabelo ukuthi imali ibhadalwe.
Imidlalo yabasakhulayo isekelwa nguHulumende kodwa labosomabhizimusi bakhululekile ukuphathisa ngabalakho.
Imidlalo izaqalisa mhlaka 17 kusiyafika kumhlaka 27 kuNcwabakwazi. Abadlali labagijimi abedlula i-15 000 bakhangelelwe ukuthi bancintisele igolide kulumthimba.
Lonyaka imncintiswano iyehlukene laleyo eyancintiselwa kuminyaka edluleyo. Inguquko ekhona ibalisa imidlalo emitsha lokusetshenziswa kwenkundla kuzigaba ezitshiyeneyo.
Iphelele yonke imidlalo ibalisa ukugijima, basketball, ingqindi, chess, khilikithi, cycling, darts, football, galufu, handball, hockey, karate, ibhola lokuqaga, pool, rowing; rugby, shooting, swimming, table tennis, tennis, volleyball le-weightlifting.
Lonyaka kulemidlalo engamatshumi amabili lambili ezadlalwa. Kumidlalo le kuzancintisa njalo amakolitshi lamanyuvesithi. Akukaze kwenzakale lokhu ngoba kumincintiswano edluleyo bekuncintisa abantwana bezikolo eziphansi, ikakhulu abaleminyaka engamatshumi amabili kusiya phansi.
Kubikwa isikolo seFatima High esiseLupane sizaphatha imidlalo ye-Under-18 volleyball. Isikolo seMarist Brothers esiseDete sizaqhuba imncintiswano yomdlalo ye-table tennis.
KoBulawayo kuzakuba lomdlalo wokubhukutsha, ihockey, irowing lekhilikithi.
Ngemizamo yokuqinisa amaqembu esizwe aphuma kulumncintiswano, abaqoqi bemidlalo yabasakhulayo bakubone kufanele ukuthi kwengezwe imidlalo lenani labadlali abancintisayo. IHwange izaphatha imidlalo le. Kwandise ukuba idolobho elilodwa liqhube yonke imidlalo.
