Akwaziwa lutho ngoKhama Billiat

Akwaziwa lutho ngoKhama Billiat

0 288
UKhama Billiat

AKAKASITHATHI isinqumo ngeqembu ayodlala kulo phetsheya kolwandle uKhama Billiat otshiyayo kuMamelodi Sundowns ekupheleni kwesizini.

Isivumelwano sokudlala kwakhe lumdlali kuSundowns siyaphela ngoNhlangula. UBilliat odabuka eZimbabwe uyinyama emaqenjini aphetsheya kolwandle.

Ucathanyelwa yiQarabag yase-Azerbaijan, LA Galaxy yase-United State of America lamaqembu aseSweden laseBelgium.

Umanenja wakhe, uMike Ngobeni we-M-Sport-Management, uthe abakasithathi isinqumo sokuthi uBilliat uzosayina kuliphi iqembu.

“Okwamanje sisaxoxa, asikasayini lutho. Uma konke sekuphothuliwe ngizokwazisa umhlaba. Okwamanje sisesigabeni esibucayi sezingxoxo,” kutsho uNgobeni.

UBilliat usenqobe citshe zonke izicoco ezimqoka kuSundowns. Ukhale wemuka lezicoco ezintathu ze-Absa Premiership, eseTelkom Knockout, Nedbank Cup, Caf Champions League leseCAF Super Cup.

Uphinde wayibamba kuFifa Club World Cup ebiseJapan ngo-2016. Ngo-2017 umele iZimbabwe ku-Africa Cup of Nations (Afcon) eGabon.

UBilliat ufike kuSundowns ngo-2013 esuka kwi-Ajax Cape Town. Uzalandela ezinyathelweni zabadlali abafana loKeagan Dolly loBongani Zungu bonke abatshaye into ecokemekayo ngemuva kwalokho bathola amadlelo aluhlaza phetsheya kolwandle.

Lakusizini le uBilliat ubambe elikhulu iqhaza ekutheni iSundowns ihlabane ngesicoco seligi kwazise ngaso sonke isikhathi nxa isenkundleni ubenza umehluko ngokutshaya amagoli amqoka.

Kulisizini uBilliat usetshaye amabhola ayisitshiyagalombili emidlalweni elitshumu lanhlanu kuligi. Kubhekwe ukuthi alandele ezinyathelweni zabadlali baseZimbabwe abafike phetsheya baphenduka izilomo emaqenjini ase-Europe njengoBenjani Mwaruwari, Peter Ndlovu, Nyasha Mushekwi loKnowledge Musona.

Kulindeleke ukuthi adlale kuSundowns kuze kuphele inyanga kaNhlangula okuphela ngawo isivumelwano sokudlala kwakhe. — Ubulembu

SIMILAR ARTICLES

NO COMMENTS

Leave a Reply