‘AKUSELA LUTHO KU-BOSSO LE-DEMBARE’

‘AKUSELA LUTHO KU-BOSSO LE-DEMBARE’

0 141
Madinda Ndlovu

YiNtatheli kaMthunywa
ABASEKELI bamaqembu amakhulu kumdlalo wenguqu kuleli, iHighlanders leDynamos bakhala ezimathonsi ngokuthi abadlali bamathimu la abazi lutho ngobukhulu bokudibana kwamaqembu la.

Kuvele ukuthi umdlalo odibanisa “okwakuzinkunzi” zebhola kuleli ngeSonto eBarbourfields awusoze ubemnandi njengaleyo eyakudala.

UMthunywa uxoxe labasekeli kumaqembu womabili avumelane ukuthi awasela dlabuzane ngenxa yabadlali abadlala udaka.

Umsekeli weBosso omkhulu uNkululeko Tshambo ubike ngokudana okukhulu ukuthi balutshwane abasekeli boqobo abajabulileyo ngokudlala kweqembu labo.

Uthe kudala umdlalo weHighlanders leDynamos ubusesatshwa njalo umkhulu kodwa khathesi kawusela sisindo.

“Kudala ubumkhulu lumdlalo ngoba wonke amaqembu abedlala inguqu ehlabusayo. Khathesi sekuyikukhuluma kuphela, akusela lutho. Akusela dlabuzane. Ayisimi ngedwa engikubona njalo, ngikhuluma okusenhliziyweni zenengi lethu. Abadlali bakhathesi basephula inhliziyo,” kutsho uTshambo.

Uqhubeke wathi inkinga ikubadala beqembu.

“Inkokheli zeqembu azilandaba lempilo zabadlali. Singasola abadlali kodwa kukhona okungayisikho emahofisini. Ngibona angathi abafana abaphiwa konke okumele bakuthole.”

UCosmas Dzirutwe osekela iDynamos uvumelane lokukhulunywe nguTshambo.

“Sesilandela ithimu yethu ngoba akula eyinye esingayisekela. Iqiniso elibuhlungu yikuthi abadlali bayasidanisa. Kusasa bayanqoba, ngeviki ezayo bayadliwa, pho kubizwa kuthiwani lokho?

“Umdlalo wethu leHighlanders ungahlabusa kumbe udanise kodwa ngilethemba lokunqoba.

Elinye lamalunga eHighlanders uThamsanqa Ncube ukholelwa ukuthi loba iqembu lakhe lisadalala, kungaba ngcono ekele ukusekela inguqu nxa lingadliwa yiDynamos.

“Ukunqoba kulumdlalo ngeSonto kuqakatheke ukwedlula ukunqoba iligi. Kungagcono sidliwe yonke imidlalo kulokuthi sidliwe yiDynamos,” kutsho uNcube ohlala eMorningside.

Umsekeli ongabuzwayo kuHighlanders owaziwa ngokuthi nguTeekay uthe yena uzaqina ngokuhlaziya ukuthi umqeqetshi uMadinda Ndlovu uyihlele njani ithimu.

“Siyakhona eMagumeni silanda ukuyakhuza ekaMatshobana. Nxa singekela ihlasele yodwa izaphuma lani?

Sizayinqoba kuphela iDynamos.

“Ngizafuna ukubonisisa umqondo womqeqetshi lokuthi abadlali bethu sebekhule okunganani nxa bedlala leqembu elinjengeDeMbare. Loba abanye bengawuzwa kuhle lumdlalo, mina ngithi phambili ngeBosso.”

Inengi labasekeli bamathimu la likhulume ngokuthi akumelanga kube lodlame mhla womdlalo. Kwandise ukuthi kuvuke umsindo sekuliwa langaphandle kwenkundla nxa kudibene amaqembu la.

AbeDynamos batshele uMthunywa ukuthi udlame luyabyisela inguqu emuva.

“Akulamuntu othanda umsindo ngoba sonke sibukela inguqu sijonge ukukholisa. Umdlalo wethu awunxuse imuli lalabo abafisa ukubukela. Ngililunga leDynamos kodwa ngiyathokoza nxa abanye bami abakuHighlanders bekhuza udlame. Asiqhubekeni ngokubambana,” kutsho uBrighton Sadomba.

Kusenjalo, ihofisi yeBosso icela ukuthi abalandeli kuzwa beqembu bahlangane ngoMgqibelo kukhankaselwa ukuthi bagcwalise inkundla yeBF.

IHighlanders ikhankase lasebulenjini ku #FillUpBF #NoToHooliganism.

“Asihlanganeni sigcwalise iBF. Sizakuba lomkhankaso ngoMgqibelo ngehola lika-9 emahofisini ethu akuRobert Mugabe Way phakathi kuka 3rd lo4th Avenue.”

SIMILAR ARTICLES

NO COMMENTS

Leave a Reply