uMthunywa
YiNtatheli kaMthunywa
IZAKHAMIZI zelokitshini leCowdray Park koBulawayo sezithwele amagabha avuzayo ngotikolotshi okubikwa bajikijela izakhamizi ezidlulayo ebusuku ngamatshe.
Kubikwa ilanga lingavele litshone ondofa laba bazenzela umathanda emgwaqweni eduzane leTerminus ngoba wonke umuntu odlulayo uyajikijelwa ngamatshe.
Imota ezinengi ezidlulayo kubikwa lazo zitshaywa ama-windscreen osekubangele ukuba abantu bengasahambi ebusuku.
Lokhu kubikwa kwenzakala nsukuzonke ntambama ngakho izakhamizi lezi sezize zabopha iqhinga lokuthi kudingwe inyanga ezilamandla ezizakhupha ondofa laba.
UMnumzana Jairos Msimanga uthe wehla umtshova sekuhlwile engazi ukuthi usezithezele olulenkume ngoba wahlaselwa ngamatshe ayevela indawana yonke.
“Mina ngangicabanga ukuthi ngijikijelwa ngabantwana abagangileyo kodwa amatshe akhona ayevelela endaweni zonke. Amatshe la asebulele amafasitela ezindlu kuthi abanye abantu balimala.
“Ilokitshi leli lingcole okumangalisayo ngoba ngomnyaka odluleyo kwake kwaba lama-satanist ahluphayo. Kulezinto ezinengi ezingazwisisekiyo ezenzakalayo lapha kungakho kumele kudingwe inyanga ezilamandla ezizakhupha otikolotshi laba,” kulandisa uMnu Msimanga.
Esinye njalo isakhamuzi uNkosazana Nesisa Dliwayo uthe useze efisa lokuthutha kuleli lokitshi ngoba kugcwele imimoya emibi.
“Abantu batshaywa nsukuzonke ebusuku yizinto ezingabonakaliyo. Kudala sasisazi ukuthi ondofa batholakala emakhaya kodwa sekwaguquka nanko phela ondofa bakhona sebehlupha lathi thina esisemadolobheni.
“Ngabe izindlu ziyaphakanyiswa mina eyami bengizayisusa kuleli lokitshi ngoba kugcwele izithunywa zikaSathane.
Abantu sebefelwa zimpahla zabo ngenxa yabotikolotshi laba.
“Sibe lomhlangano ngoLwesibili ngakho sivumelane ukuthi kudingwe inyanga ezizazokhipha izinto lezi,” kuphetha uNkkszn Dliwayo.
UKhansila uMnumzana Collet Ndlovu uthe indaba yabondofa laba iyahlupha njalo abantu abanengi sebelahlekelwe zimpahla zabo. “Abantu abanengi sebafelwa ngamafasitela kuthi abanye batshaywa ngamatshe yizinto lezi ezingabonakaliyo. Sicabangela ukuthi ngotikolotshi abajikijela abantu ngakho kuzaba lokuhlanzwa kwendawo yethu ngoMgqibelo,” uphetha uKhansila Ndlovu.
