uMthunywa
Cornelius Luphahla
KULANDELA ukukhitshwa kwendaba kagogo otshade lomzukulu wakhe eLupane kumaviki amabili edluleyo ingcitshi ezicubungula ngezamasiko ziveze kabanzi ngale indaba esidide uMthwakazi wonke zaveza ukuba lokhu akumangalisi kangako.
Njengoba indaba le ibikhanya njenge nsindabaphenduli intatheli ixhumane lengwevu ezehlukeneyo kanye lengcitshi zamasiko okuyikho ethole khona imibono eyehlukeneyo mayelana lale indaba esekela ukungamangalisi kwale indaba.
Ekhuluma loMthunywa omunye walezingwevu uMnumzana Isaac Nyandeni Mpofu uchaze ukuthi umtshado phakathi kukagogo lomzukulu kawukho esikweni likaMthwakazi ngaphandle nxa kungumdlalo nje.
“Lokhu ngathwetshulwa yingwe angikaze ngizwe kuthiwa umzukulu utshada logogo wakhe. Njengoba kuthiwa umzukulu lo okukhulunywa ngaye kulindaba uleminyaka engu-7 ugogo ele 81 kutsho ukuthi umtshado lo ngowokusomisana.
“Noma nje ungowokusomisana kodwa akwaze kwavunyelwa umntwana ekhasela eziko okuyikuthi umuntu engenza into enjalo usengaphetha ekwenza kuphile. Khona vele esintwini umtshado wawungekho kulomthimba okuyikuthi singathi ugogo lomzukulu bebelomdlalo nje wokujabulisa abantu,” kutsho uMnu Mpofu.
UMthunywa ubuye njalo wakhulumisana loMnumzana Albert Nyoni ongumgcinisihlalo weMatojeni Cultural Society oveze ukuthi indaba yokutshada kukagogo lomzukulu kayimangalisi kangako.
“Nxa sikhangela ngesiko lamaNdebele ukutshada kukagogo lomzukulu akumangalisi kangako ngaphandle nxa kuyikuthi sebezangena bonke engutsheni. Okungamangalisiyo yikuthi ugogo kuthiwe kade besenza umdlalo njengoba ugogo laye wazivezela ukuthi umtshado lo yikudlala nje ngeke embathe lomzukulu wakhe,” kutsho uMnu Nyoni.
UMnumzana Pathisa Nyathi okhokhela inhlanganiso yeAmagugu Cultural Association eseMatopo ubikele intatheli ukuthi umzukulu ngesiko vele uthatha kibo kagogo wakhe.
“Umtshado kagogo lomzukulu lo ukhanya ubengumfanekiso wokuthi umzukulu ngesiko lesintu kufanele athathe kibo kagogo wakhe. Lokhu akutsho ukuthi athathe ugogo wakhe kodwa kutsho ukuthi athathe abalesibongo sakhe.
“Angithi nje ugogo wandise ukudlala lomzukulu wakhe ikakhulu umntanejaha ethi “akungibhemise” esitsho emdlalisa isithwana sakhe kuyikudlala nje. Lokhu kukhuluma okukhulu okuyikuthi kuzindlela zokutshengisa ukungabilomgoqo ekuthini umzukulu athathe kogogo wakhe,” kutsho uMnu Nyathi.
Indaba le yokuthi umzukulu athathe kibo kagogo wakhe esingakufanisa lokutshada logogo wakhe ikhanya ayimangalisi nanku phela lenkosi yamaNdebele uLobhengula yathatha kibo kagogo wayo. Angithi uyise uMzilikazi wayezalwa nguCikose uMaNdiweni loMatshobana, uLobhengula wasethatha unina kaNjube lokaNguboyenja bonke bengabakoNdiweni, okutshengisa ukuthi wathatha ugogo wakhe ngoba ethethe isibongo sakhe.
