uMthunywa
UBRANDON Taylor umdlali othenjiweyo kuqembu lesizwe lekhilikithi uthe amazwe adelela iZimbabwe kumidlalo yendebe yomhlaba kulumdlalo azayangeka.
UTaylor ukhulume lokhu ngesikhathi iZimbabwe ilungiselela umdlalo wayo lesizwe seUnited Arab Emirates ozadlalwa lamuhla ekuseni.
Imidlalo yendebe yomhlaba iqhutshwa eNew Zealand laseAustralia.
IZimbabwe iphakathi kwequla lentshatshu zekhilikithi ezibalisela iSouth Africa, i-United Arab Emirates, i-Pakistan, i-West Indies le-India.
UTaylor oleminyaka yokuzalwa engu-28 ubikele intatheli zeNew Zealand ukuthi yena labanye bakhe bafuna ukubonisa abalandeli bekhilikithi ukuthi bayazi abakwenzayo kulumdlalo.
Uthe bazaqala ngokutshaya iUAE egumeni leSaxton Oval eNew Zealand andubana bayeqedisa eziseleyo kuhambo lwabo lokuya kuma-quarter-final.
“Asesabi lutho la ngoba sifana lamaqembu wonke esizadlala lawo. Okwakhathesi siphakathi kwamalungiselelo omdlalo wethu le-UAE esilethemba lokuthi sizawunqoba.
“Sisebenza gadalala silolongela ukuthi senze ubungcono bethu emidlalweni le ngoba balutshwane abacabangela ukuthi sizanqoba,†kutsho uTaylor.
Loba umdlali lo, ophinda abengunozinti wethimu efunga kanje, kuyaziwa ukuthi iZimbabwe iyaxega njengoba abadlali bedonse nzima kumdlalo wabo wakuqala leSouth Africa ngeSonto.
UTaylor ukhangelelwe ukukhokhela ithimu ehlangene labadlali ababalisa abanye abathenjiweyo ukaputeni uElton Chigumbura, uHalmiton Masakadza, uSolomon Mire, uCraig Ervine loChamunorwa Chibaba.
Umdlali lo uhamba ezithendeni zika Ray Price umdlali wekhilikithi owaba lodumo eminyakeni edluleyo njalo wacina esedlala laku Indian Premier League (IPL).
“Ngizwa ngilokujabula okukhulu ukuba yingxenye yalumncintiswano weWorld Cup, ikakhulu ukubangomunye wabadlali abaphethe amathemba esizwe. “Ngifuna ukwethulela ilizwe lakithi inhlonipho, ngokunqoba emdlalweni le,†kuqhuba uTaylor.
Abadlali abakhangelelwe ukukhethwa phakathi kweZimbabwe le-United Arab Emirates:
Zimbabwe: Chamu Chibhabha, Sikandar Raza, Hamilton Masakadza, Brendan Taylor (wk), Sean Williams, Craig Ervine, Elton Chigumbura (capt), Solomon Mire, Tinashe Panyangara, Tendai Chatara, Tafadzwa Kamungozi.
UAE : Amjad Ali, Andri Berenger, Krishna Chandran, Khurram Khan, Swapnil Patil (wk), Shaiman Anwar, Rohan Mustafa, Mohammad Naveed, Amjad Javed, Mohammad Tauqir (capt), Nasir Aziz. — Yintatheli/ Ubulembu
