uMthunywa
NguLungelo Ndhlovu
ABAHLABELELI labosaziwayo kwezokuzithokozisa koBulawayo bazonde abazazi njalo abafuni lokuzwa ngebizo elithi Nama.
Kumkhosi weNational Arts Merit Awards oqhutshwe koBulawayo ngoMgqibelo odluleyo, kuvele ukuthi akulangitsho umdlali kumbe umhlabeleli wakoNtuthu osuthisekileyo.
Abakhulume loMthunywa ngosuku lokunikeza izicoco bathe akukaze kube lomkhosi weNama onjengalo. Bakhulume kanje besola indlela okwaqhutshwa, kwaqoqwa ngayo. Inengi lavalelwa phandle.
Kuzwakale ukuthi bakhona abanye abahlabeleli bakoBulawayo abavalelwe phandle emkhosini lo, iloba umkhosi lo uqhutshwe khonapha edolobheni lakoBulawayo.
Abahlabeleli abatshiyeneyo abakhulume lephephandaba leli baveze ukuthi akumelanga kube lenkethabetshabi emkhosini ofana lalo ngoba ungowabahlabeleli belizwe lonke.
UNkululeko Nkala ubike ukuthi yena, uqobo lwakhe ubone izinto ezinengi ezimsuthisileyo emkhosini lo.
“Ngicabanga ukuthi kunengi okuhle okwenzakeleyo emkhosini wamaNama. Okunye engikubonileyo yikuthi ungeke wachaza wonke umuntu.
“Okumqoka obekumele kwenziwe yiziphathamandla zeNama yikuthi, bekumele bazi abadala balapha koBulawayo, abafana labo Cont Mhlanga kanye labanye abahlabeleli abaqakathekileyo abafana labo Black uMfolosi,” kutsho uNkala.
Ubike njalo ukuthi abahlabeleli labo kumele bancindezele imiculo ekhanyayo ukuze labo bangene emkhosini efana lale njalo umkhosi lo uqakathekisa imisebenzi yabantu kusiya ngokuthi bazimisele okunganani.
“Khathesi sokuyisikhathi sokukhuthazana njengabahlabeleli ukuthi sipheke umculo okwabithwayo kanye lamavidiyo alohlonzi. Ungeke wamane nje uhambise amanyala kumaNama, uthi uzaphiwa isicoco,” kuqhuba uNkala.
Umaqhuzu wezemidlalo e-Amakhosi, uCont Mhlanga wakhalala ukuya kuNama, esola indlela amenywa ngayo emkhosini lo. UMhlanga wamenya ngomlayezo weSMS nje qha njalo kazange aphiwe inhlonipho njengomuntu omdala lapha eMatabeleland nxa sikhangele imisebenzi yakhe kwezokuphekwa kwamafilimu kanye lokuphakanyiswa kwezemiculo esabelweni lesi.
UKhulekani “Khuxman” Bethule uthe iNama kumele ibone ukuthi iyalungisisa amaphutha afana lala, ngoba lokhu kululaza isimilo sabantu abaqakathekileyo njengalaba.
“Uma ngingapha umzekeliso, ungeke wanxusa umuntu ofana lomhlabeleli olodumo uOliver Mtukudzi ngomlayezo weSMS. Lathi silabo abantu esibaqakathekisayo kakhulu emhlubulweni wemaNdebeleni njalo abantu laba kumele banikezwe inhlopho egcweleyo,” kutsho uKhuxman.
Uveze njalo ukuthi ngomnyaka ozayo kumele abaqoqi bomkhosi lo babone ukuthi bayalungisisa impazamo ezinjengalezi ukuze basuthise wonke umuntu njalo umkhosi lo uzathola usekelo olugcweleyo kubahlabeleli kanye lasemphakathini.
“Ngomnyaka ozayo sikhangelele ukuthi abantu bazikhethele abahlabeleli ababathandayo njalo kumele kusetshenziswe lindlela ekunikezeni izicoco kubahlabeleli labo.
Kasifuni kubona abahlabeleli abazikhethayo, besebenikezwa izicoco emkhosini lo,” kuphetha uKhuxman.
Imbongi elodumo koBulawayo, uSithandazile Dube uthe akumelanga ukuthi abahlabeleli bakhalale ukuya emkhosini weNama uma bengaphathekanga ngoba lokhu kubisela emuva ingqubela phambili.
“Umkhosi weNama ngowethu sonke njengabahlabeleli ngakho kumele sikhombise ukuthi sibambene sihambe kuwo. Ukukhalala ukuya emkhosini lo akungeke kulungise lutho kodwa kufana lokuzigwaza ngowakho umkhonto enyaweni ngoba uyabe ubisela muva ingqubekela phambili yohlelo olufana lalolu,” kutsho umaDube.
UJeys Marabini ubike ukuthi ukukhalala ukuya kuNama kuqondile ngoba into embi, imbi njalo akumelanga abantu batshaye inja befihla umphini.
“Sikhangelele ukuthi inkokheli zeNama kube yizo ezilolwazi ngabaculi abaqakathekileyo futhi ziphe lenhlonipho. Izinto kumele zihanjiswe ngendlela hatshi ukujobelela.
“Ngizwe kuthiwa oCont Mhlanga bamenya ngemilayezo, amaSMS.”
