uMthunywa
Yintatheli kaMthunywa
IQEMBU lamaWarriors lizadlala lize lifike kusigaba sama-final omqhugelwano weAfrican Championships (Chan) ngoZibandlela ngoba akulalizwe elingancintisana lalo, kutsho umaneja uSharrif Mussa.
Imidlalo yenkezo yeChan isezweni leRwanda njalo kumpelaviki edluleyo inhlanganiso yeConfederation of African Football iqhube umkhosi wokwehlukanisa amazwe azaphatheka kumaqula awo wokudlala.
Umqhugelwano lo udlalelwa yilabo abatshibilika kumaligi asemazweni akubo kuphela. Abadlali bamaWarriors ababalisa uKudakwashe Mahachi, uKhama Billiat loKnowledge Musona abavunyelwa kulumncintiswano.
Ngomnyaka odluleyo amaWarriors adlala kulumncintiswano aphelela kunombolo yesithathu, loba nje kwakukhangelelwe ukuthi kube yiyo ithimu ezafika kuma-final.
AmaWarriors akuqula lika-D lapho okulamazwe abalisa iMali, iUganda leZambia.UMussa uthe phakathi kwamazwe la ababoni lelilodwa elinganikeza amaWarriors udubo. Amazwe eMali leZambia kuyaziwa ukuthi alabadlali abazingcitshi, okuyikhona okutshayisa abalandeli ngovalo becabangela ukuthi amaWarriors angene kuqula “lokufa”.
Umaneja wesizwe lo ubika ukuthi ibhola labafana beZimbabwe lisezingeni eliphezulu okokuthi labaqeqetshi benguqu kumazwe eAfrica bayazi lokho. Uthe okwenza amaWarriors azethemba yikuthi awasoze adlale lamazwe azinkunzi zenguqu ikakhulu iNigeria, iIvory Coast, iAngola, iSenegal lezinye.
UMussa ukhulume lokhu ebulenjini lakukhasi lembiko yeCafonline ngesikhathi intatheli zemidlalo zidingisisa umbono wakhe mayelana lequla lamazwe afakwe ukuthi adlale leZimbabwe.
“Kuzabalula ukuthi siyefika ku-final ngokubona kwami. AmaWarriors aku-group D labomakhelwane iZambia, iMali leUganda. Ungakhangelisisa, amazwe la sesike sadlala lawo sawanqoba kumidlalo eminengi. Kulumncintiswano kumele sidlale ukwedlula esakwenza ngomnyaka inkezo le idlalelwa eSouth Africa.
“Iqembu kumele lilungiselele okuzwayo. Akulalizwe okuthiwa lincane kwezenguqu khathesi, ngakho abaqeqetshi bethu abaphiwe isikhathi eside belabadlali.”
UMussa uthe uzakhuthaza ithimu ukuthi iphange ukuthi ibuthane kusesemasinyane ukuze abadlali bathole isikhathi eside belolonga lomqeqetshi wabo uCallisto Pasuwa.
“Kubalulekile ukuthi ithimu iqale ukubuthana. Nxa kungenzeka, umqeqetshi kuzamele ahlanganise abadlali ngokuphela kwesizini. Sihlele ukuthi abadlali bahlale bendawonye kuze kuphele inyanga kaMpalakazi, anduba balubhekise eRwanda ngoZibandlela ozayo,” nguMussa lo.
Uqhubeke wathi umqhugelwano weChan uqakathekile kubadlali beAfrica ngoba bothola ukuzethemba njengabadlali abakhetha ukudlala ekhaya kulokuthi bayetshibilika emazweni lapho inguqu elemali khona.
“Siyayibongela inkezo yeChan ngoba ipha abadlali ithuba lokutshengisa kubalandeli benguqu yeAfrica.
Kuyabonakala ukuthi likhona ithalenta kumaligi akulindawo, njengalokho okwenzakala kubadlali abathengwa kwamanye amazwe.”
