uMthunywa
Ncekwenhle Ncube
KULANDELA amahemuhemu agcwele enkundleni zokuxhumana ebulenjini athi iKhansili yakoBulawayo isiqalile ukuqhatsha labo abazancedisa ukwakha i-Mall yeGodini ikhansili ikhuphe umbiko wokuthi labo abaloba leyombiko basenga ezimithiyo.
Kumbiko odindwe ngumabhalani weKhansili uMnumzana Christopher Dube uxwayise umphakathi ukuthi bengayinaki imbiko egcwele ebulenjini.
“IKhansili yedolobho lakoBulawayo ihambisana le nkampani yeTerracotta Private Limited ithanda ukwazisa bonke abahlali balapha ukuthi imbiko egcwele kuWhatsapp lezinye inkundla zokuxhumana ngokuqhatshwa kwabakhi be-Mall ngamanga.
“Sixwayisa uzulu ukuthi akulamuntu oqhatshwe yikhansili ukuthi aqhatshe abantu abazakwakha ngakho zakhamizi nxa ekhona okhuluma lokho kabotshiswe emapholiseni noma ebike ekhansilini yethu,” kuchaza umbiko lo.
Izakhamizi zakoBulawayo ziyalimukiswa ukuthi ukuqhatshwa kwabantu kuzaba segcekeni njalo abantu bazakwaziswa ukuthi nini kusetshenziswa amaphephanda kanye lemisakazo njengenhlalayenza. IGodini Mall izaqala ukuqhatsha ngemva kokwakhiwa kwamahofisi kuBasch Street. Kunjalo nje akulamuntu ozabhadala ukuze azuze umsebenzi.
Umbiko lo uza abantu abanengi sebethathelwe izimali zabo yizigilamkhuba ezithize ebezisithi zizabanika umsebenzi.
Kusenjalo ngeviki ephelileyo bekulembiko ebigcwele kuFacebook lakuWhatsApp ibika ukuthi kuyabhaliswa koMsitheli bonke labo abafisa ukuba yingxenye yokwakha iGodini Mall.
Ikhansili ibike ukuthi iGodini Mall izavulela izizalwane zakoBulawayo imsebenzi kodwa okwakhathesi akukaqhatshwa muntu.
