uMthunywa
Arnold Ndlovu
KULAMADODA amabili agwetshelwe ukuyapika ejele iminyaka engu-36 womabili ngemva kokutholakala elecala lokutshontsha inkomo kamakhelwane wabo bayihlinze.
UKudzai Ndlovu oleminyaka yokuzalwa engu-30 kanye loLovemore Bhajila oleminyaka yokuzalwa engu-36 abavela eMawabeni eSigodini bamiswe phambi komthethwandaba weSigodini ngeviki ephelileyo.
Umantshi uMnumzana Tawanda Muchemwa uzwe ukuthi mhlaka 22 Nhlolanja uMnumzana Mncedisi Sibanda weNhlangano Ranch eSigodini wathi evela dibhisa inkomo zakhe wasesiyazitshiya emadlelweni lapho abasolwa ababulala khona inkomo eyodwa.
Kuzwakale ukuthi UMnu Sibanda esecatshelwe yinkomo yakhe wahamba wayabikela amapholisa.
Kubikwa amapholisa enelisa ukubopha ababili laba bethwele inyama yenkomo etshontshiweyo beyisa ezitolo zeMawabeni Business Centre ukuyayithengisa.
Ngemva kokubanjwa lokubuzisiswa kabanzi ngamapholisa bacina bekhokhela amapholisa lapho ababehlinzele khona inkomo le lapho okwatholakala khona i-tag eluhlaza eyayifakwe enkomeni eyayibhalwe Nhlangano Ranch kwasekufonelwa umnikazi wenkomo.
Inkomo abayitshontshayo le ibizathengiswa emkambo nge$600.
Ngemva kokuzwa icala lobufakazi obuvezwe enkundleni umantshi ugwebe abasolwa ukuthi bayepika iminyaka engu-18 munye ngamunye.
Umtshutshisi kulelicala bekunguMnumzana Jefter Nyikadzinashe.
