uMthunywa
Musa Janga
ABESIFAZANE sebekhuthazwe ukuba basukumele phezulu emisebenzini yabo ikakhulu kule ebonakala njengeyabesilisa.
Lokhu kuvezwe nguDirector Training Brigadier-General Godfrey Mupita ngeviki edluleyo kumkhosi wokuqeqetshwa kwamasotsha angu-107 esikolo seMilitary Police eMzilikazi Barracks.
Phakathi kwamasotsha angu-107 aqeqetshiweyo bekulabesifazane abayisitshiyagalombili.
“Nginanzelele ukuthi kulabo ababaqeqetshayo kulabesifazane abayisificaminwe mibili njalo inengi labo lenze kuhle ezifundweni zabo, lokhu kuyangijabulisa kakhulu,” kuchaza uBrig General Mupita.
Uqhubekele phambili esithi ukuqeqetshwa kwabesifazane laba kutshengisa ukuzinikela kwabo kanye lekunqobeni ubunzima abahlangana labo emisebenzini ephethwe ngabesilisa.
“Ngiyalihalalisela lonke besifazane abaqeqetshayo lamhlanje. Lenze umsebenzi obukekayo ngalokho ngithi kini lonke yazini ukuthi ukuphumelela akuhambi ngokuthi umuntu ngowesifazane kumbe ngowesilisa kodwa kuyimpumela yokusebenza nzima lokuzinikela.
“Kumele liqhubeke lizinikela ngokugcweleyo kukho konke elikwenzayo litshengise umphakathi ukuthi sonke siyalingana lapha emhlabeni,” kuphetha uBrig General Mupita.
