uMthunywa
NguMsilisi Dube
INHLANGANISO ezimele yodwa eyeSNV ikhuthaza abazali ukuba bafundise abantwababo ngokuziphatha kuhle nxa sebengena esikhathini ukwenzela ukuba bangahlaselwa yimikhuhlane etshiyeneyo.
Abazali kabavamanga ukufundisa abantwababo ngokungena esikhathini okucina kubangela ukuba bahlaselwe yimikhuhlane efana lemvukuzane leminye ehlukeneyo.
Ekhuluma loMthunywa uNkosikazi Lindile Ncube oyisisebenzi senhlanganiso le, uthe abantwana ikakhulu abemaphandleni bavame ukuswela ama-pads okucina kubangela ukuba basebenzise amalembu angcolileyo.
“Ukungena esikhathini kubuhlungu kakhulu ngakho umntwana kuyabe kumele athole impahla yonke ukuze angazingcolisi. Abantwana bavame ukusebenzisa amalembu angcolileyo, amaphepha kunye lamahlamvu.
Lokhu kuyingozi ngoba umntwana ulakho ukuhlaselwa yimikhuhlane efana lemvukuzane,” kuchaza uNkkz Ncube.
Uqhubekele phambili wathi ekuchwayisiseni abakwenzayo bananzelela ukuthi abazali kabalasikhathi sokufundisa abantwababo ngokungena esikhathini.
“Umzali engekela ukuzifundisela umntanakhe ngokungena esikhathini ucina ethola imfundiso engaqondanga acine esebenzise indlela lezi ezingaqondanga,” kuveza uNkkz Ncube.
Omunye umzali uNkosazana Sanelisiwe Moyo uthe kunzima ukuchazela umntwana ngokungena esikhathini ngoba kungathi kulihlazo. “Kudala sisakhula kasizange sifundiswe ngokungena esikhathini. Indaba yokungena esikhathini yayiphathwa njengeqanda ngakho abazali bethu babelenhloni ukusitshela ngendaba le.
“Lami kusuke kubenzima ukuba umntanami ngimfundise njani ngoba lami angizange ngifundiswe.
“Owami umntwana wafundiswa esikolo ngokungena esikhathini ngoba mina kunginzimela ukuba ngimqalisele ngaphi.,” kuchaza uNszn Moyo.
Omunye njalo umzali uMnumzana Edwin Nyoni uthe akuqondanga ukuba abantwana bafundiswe ngokungena esikhathini esikolo kodwa umzali kumele aziphe umlandu wokufundisa umntanakhe ngekhaya.
“Isikhathi esiphila kiso siyavuma ukuba umzali azifundisele umntanakhe ngokuziphatha kuhle nxa esesikhathini.
Kungani kumele afundiswe esikolo yena ehlala lonina laye ongenayo esikhathini,” kuchaza uMnu Nyoni.
