Abaqeqetshi badinga ithalenta emakhaya

20 Sep, 2018 - 00:09 0 Views

uMthunywa

YiNtatheli kaMthunywa
ABAQEQETSHI beqembu leBulawayo City uBruce Tshuma loInnocent Mapuranga babika ngokuzimisela ukuthi bengenza loba yini ukuthi badinge ithalenta lenguqu emaphandleni.

Bobabili babike lokhu baphosa bahlengezela inyembezi kumkhosi weMaphumani Tournament oqhutshelwe emaphandleni aseGwanda ngempelaviki.

Abaqeqetshi laba bebelande ukuyacupha ithalenta kulumncintiswano kanobhutshuzwayo lokuqaga osekelwe kabanzi nguGolden Sibanda usomabhizimusi osePretoria, eSouth Africa.

“Kuthi ngikhale nxa ngibona abantwana abazi ibhola lenyawo njengalokho engikubona lapha. Thina njengabaqeqetshi kumele sithathe abantwana laba sibafikise kumaqembu asemadolobheni. Ithalenta lenguqu ligcwele yonke indawo.

“Ngamanga aluhlaza tshoko ukuthi emadolobheni yikho okulethalenta kuphela. IGwanda iyabusa ngebhola ngakho ngizakhuthaza abanye ukuthi bavakatshe ukuzobona mathupha iziphiwo zabantwana,” kutsho uTshuma.

UTshuma loMapuranga badlalela iHighlanders anduba bakhethe ukuqeqetsha.

UMapuranga owenza udumo engukaputeni kwezikaMagebhula uthe izikolo ezisemaphandleni esigabeni seGwanda kumele zithole usekelo kwezemidlalo ukuze abasakhulayo bakwazi ukuba ithalenta liyabhadala.

“Okubalulekileyo yikuphakamisa ithalenta. Umdlali wenguqu olesiphiwo akumelanga acatshiswe ekhaya. Sikhona thina abaqeqetshi abaphuma emadolobheni abazi mhlophe ukuthi umntwana odlala ibhola kumele afundisweni. Ngibonga abantu abafana loGolden Sibanda ngokuzinikela ukusekela kanje. Mina lomfowethu uBruce, sizimisele ukuthi senze loba yini ukuthi abantwana baseGwanda bafinyelele kumaqembu asemadolobheni.”

Kulumqhudelwano kuvele ukuba abafana besikolo abakade bengazi ukuthi izicathulo zikanobhutshuzwayo zigqokwa njani bathole injabulo ngokunikwa isipho sempahla yalumdlalo.

Inengi lamaqembu ezikolo zemfundo yaphansi eziseziqintini ezisemaphandleni aseGwanda azitholi ithuba lokuncintisa kumiqhudelwano emikhulu edibanisa izikolo ngenxa yokuswela.

Kodwa, ngoLwesihlanu oledluleyo izikolo eziyisikhombisa ziphucuke ngokuphiwa izipho lemivuzo ngemva kokuqhuba kuhle imidlalo yeMaphumani Tournament enkundleni yesikolo seNgoma Primary.

Kulumthimba wemidlalo bekuncintisana lamankazana kubhola lokuqaga.

Izikolo eziphatheke kunkezo yeMaphumani yiNhwali Primary, Mkhalipe Primary, Zenya Primary, Patana Primary, Seboza Primary, Ngoma Primary leMphaya Primary.

Isikolo seNgoma sibeyintshantshu kulandela ukunqoba kwaso iZenya nge 3-2 kumbekwa.

Bebekhona abadlali abakade begqoke bephelele kodwa inengi belidlala ngenhliziyo kukhanya ukuthi izikolo abavela kuzo zidonsa nzima. Ngemva kokunanzelela ukuthi ziyasokola izikolo, isakhamuzi sakulindawo uGolden Sibanda ukhethe ukusekela imidlalo le ngezipho.

USibanda ophinda abengusomabhizimusi esePretoria eSouth Africa utshele uMthunywa ngemva komncintiswano ukuthi uzaqhubekela phambili esekela abantwana kwezemidlalo.

“Ukukhulisa abantwana ngokubasekela kuthalenta labo kuhlezi kuseduzane lami. Ngithe ngisekele lumncintiswano engiwubize ngebizo likagogo wami uMavhungu Maphumani owatshona ngo2014.

Isiqokoqela yikuthi sibonakalise ithalenta elingaziwayo ikakhulu kuzikolo ze-primary endaweni yakithi.

“Inkezo yeMaphumani Tournament izahlala iqhutshwa minyaka yonke ngakho akube yingqobe kuzikolo zonke ezilapha ukuthi ziphakamise umdlalo wazo. Okuqakathekileyo yikukhulisa ithalenta labantwabethu lokuthuthukisa isigaba,” kutsho uSibanda.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds