Abalimi beTwalumba balungiselela ukulima iBarley

13 Mar, 2015 - 17:03 0 Views
Abalimi  beTwalumba balungiselela ukulima iBarley

uMthunywa

YiNtatheli kaMthunywa
ABALIMI beTwalumba Irrigation Scheme eManjolo baphakathi kokulungiselela ukulima isilimo seBarley ukuze babelakho ukuziphilisa njengoba udubo lwendlala luvame ukuhlupha kulumango.Abalimi bakulumango bavame ukulima izilimo ezingamelani lomkhathi wakhonale okucina kubangela ukuthi bengavuni isivuno abayabe besikhangelele.

Umgcinisihlalo weqembu labalimi leli uMnumzana Trust Munkuli ubikele iphephandaba leli ukuba bazalima isilimo lesi ngoba sivuma emhlabathini wabo njalo silakho ukumelana lokutshisa kwelanga.

“Sesihlole umhlabathi wethu sathola ukuba isilimo esivuma ukulinywa sikhule kuhle kundawo yethu yiBarley.

“Asikaze silime isilimo lesi ngakho siyakholwa ukuba uma konke kuhambe ngendlela esikuhlele ngakho sizathola isivuno esihle. Umhlabathi wethu uyisidaka ngakho abakhangele ngezokulima basicebisa ukuba silime isilimo lesi ukwenzela ukuba sizitshayele imali.

“Sivame ukulima izilimo ezibalisa ingqoloyi, umumbu kunye lezinye ezitshiyeneyo kodwa uhlupho ebesilalo ngamanzi okuthelezela. Lonyaka sesilungisile impompi zamanzi ngakho ngeviki ezayo siyabe sihlanyela kuphela ngoba konke sekulungile,” kuchaza uMnu Munkuli.

UMnu Munkuli uqhubekele phambili wakhuthaza abalimi bezinye izigaba ukuba balime izilimo ezihambelana lomhlabathi wabo ukwenzela ukuthi bazitshayele inala.

“Abalimi bavame ukulima izilimo ezingavumiyo emhlabathini wabo okucina kubangela ukuba zingakhuli kuhle.

Kuqakathekile ukuthi umlimi aqale ahlole umhlabathi wakhe kuqala engakalimi kuwo ukuze athole isivuno esiphezulu.

“Abalimi ikakhulu abemangweni wendaweni ezingelazulu elinengi kumele balime izilimo ezincane ezilakho ukumelana lomumo womkhathi ukwenzela ukuba bazuze isivuno abasikhangeleleyo,” kuchaza uMnu Munkuli.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds