uMthunywa
Msilisi Dube
ABALIMI beManjolo eBinga bazibambile ekulimeni isihlahlakazana se-moringa nanko phela kubikwa sibapha inzuzo enhle ebenza benelise ukuziphilisa.
Isihlahla se-moringa siyaqinisa njalo siyelapha umzimba ngakho abantu sebesithakazelela kakhulu osekusenza inengi liyesidinga khonale eBinga .
UMthunywa uxhumane lelinye ilunga leNyampuka Health Foods esekelwa ngabeChristian Care, uNkosikazi Veronica Mupande waveza ukuthi inhlanganiso yabo izuza inzuzo enhle ngokulima izihlahla zesintu ikakhulu isihlahla se-moringa sona esingumuthi.
“Isihlahla lesi singumuthi kusukela kumpande zaso kusiya kumahlamvu aso.
“Isihlahla lesi sisipha imali sikhathi sonke ngoba kasibuni njalo kasitshazwa ngumqando. Sihlala sisihle sikhathi sonke kuthi amahlamvu aso ahluma njalo nje.
“Amahlamvu aso ayacholwa umuntu awafake elambazini besesingezelela igazi emzimbeni kuthi njalo amahlamvu aso aluhlaza ayengeza uchago kubomama abamunyisayo,†kuchaza uNkkz Mumpande.
Uphinde wathi inengi lemikhuhlane efana le-asthma, i-BP, itshukela kanye leminye imikhuhlane yocansi iyelapheka ngalesihlahla.
Uthe intanga zesihlahla lesi ziyasebenza ukwenza amafutha okupheka kanye lokukhanyisa endlini.
“Umzimba uyaqina njalo kawuhlaselwa yimikhuhlane kalula nxa umuntu esebenzisa isihlahla lesi.  Abalimi kumele bangene ehlelweni lokulima izihlahlakazana zesintu ngoba ziqinisa umzimba zibuye ziwelaphe,†kuphetha uNkkz Mumpande.
