uMthunywa
Ethel Ncube
ABALIMI besabelweni seMatabeleland sebekhuthazwe ukuthi bafuye imbuzi ngoba ziyasilela emkambo kukanti njalo zilenzunzo enhle.
Imbuzi kubikwa zilakho ukuzalana zibe zinengi ngesikhathi esifitshane okwenza umlimi azitshayele imali.
Ingcitshi kwezokufuya uMnumzana Cosmas Muzunde uveze ukuthi imbuzi zithatha isikhathi esifitshane ukuthi zizale njalo zizala kokuphela. “Imbuzi ensikazi ithatha umnyaka ukuthi ikhule kuthi impongo yona ithatha umnyaka olengxenye ukuthi ikhule.
“Imbuzi iyenelisa ukuzala amazinyane ayisithupha ngomnyaka nxa izala amawele kuthi-ke nxa izala elilodwa izala ezintathu kuminyaka emibili,” kulandisa uMnu Muzunde.
UMnu Muzunde uveze njalo ukuthi imbuzi zifuna ukufuywa lapho okulezihlanhla ezimfitshane ikakhulu ezihlabayo ezifana logagu ngoba kuyikho ukudla ezikuthandayo.
UMnu Muzunde ukhuthaze abalimi abafisa ukufuya imbuzi ukuthi kumele bazifuye esibayeni esivulekileyo kodwa babone ukuthi bayasifulela ukuze zinganethwa lizulu. “Imbuzi zifuna ukuhlala esibayeni esivulekileyo kodwa kumele sifulelwe phezulu ukuze zinganethwa nxa izulu lisina njalo isibaya lesi akumelanga sihlale simanzi
phakathi ngoba amasondo azo angavoxa udaka ziyenelisa ukuhlaselwa yimikhuhlane,” kuchaza uMnu Muzunde.
Kubikwa ukuze imbuzi zizale kuhle kumele zithole ukudla okwaneleyo zingafubi ngoba lokhu kuyenelisa ukuphazamisa ukuzala kwazo.
“Ukudla kuqakathekile kakhulu embuzini njalo kungeneli umlimi kumele athenge okunye ukudla ukuze zingalambi njalo zizale kuhle.
“Imbuzi ingaswela ukudla ngesikhathi imithi iyaphunza kungakho kunyanga ezinhlanu imithi kumele ithole ukudla okwaneleyo kanye lamanzi,” kutsho uMnu Muzunde.
UMnu Muzunde ukhuthaze abalimi ukuthi nxa izinyane lingazalwa babone ukuthi liyamunya kunina kumahola alitshumi lane lizelwe ukuze lingafi.
“Izinyane kumele limunye okwenyanga ezintathu kunina ukuze livikeleke emikhuhlaneni njalo nxa kungeliduna umlimi uyabe eselakho ukuthi alithene.
“Okunye umlimi okumele akwenze izinyane selizelwe yikufaka umfokothi phakathi kwamanzi alesawudo ukuze kungabi lezibungu ezingena phakathi ngoba lokhu kulakho ukubangela imikhuhlane ezinyaneni elisanda kuzalwa,” kutsho uMnu Muzunde.
UMnu Muzunde uphethe ngokukhuthaza labo abafisa ukufuya imbuzi ukuthi bangathandabuzi ukufika emawofisini abo eAgritex bababele ulwazi ngokudingakalayo ukuthi bazifuye.
