uMthunywa
Cornelius Luphahla
ESINTWINI ukwakhiwa kobuhlobo phakathi kwezimuli yinto eqakathekiswa kakhulu njalo enye indlela yokubakha lobubuhlobo yikuthathana kwababili.
NgeSonto kuyonale iviki ephelileyo uMthunywa uvakatshele esigabeni seNtabazinduna esiqintini seZimbili koMnumzana Mlungisi Nyathi lapho imuli yakhe ebiqala ubuhlobo ngokwesiko lemuli yakoMoyo.
UMnumzana Bongani Moyo odabuka eSiloni, eLower Gweru ubezobona umuzi wakwabozala okokuqala.
UMnu Moyo uphemba umuzi loBelinda Nyathi.
UMnu Nyathi uthe okumenze walandela isiko lokuthathana yikuthi ufuna ukuqinisa umuzi wendodakazi yakhe njalo ufuna lobuhlobo bakhiwe ngempela.
UMthunywa ukhulumisane loMnu Nyathi wachaza ukuthi umkhwenyana uvunyelwa ukwaziwa nxa esekhiphe isivulamlomo lokangaziwe.
“Umkhwenyana uhamba kwabozala ukuze aziwe nxa esevelile wakhipha isivulamlomo kanye lokangaziwe.
Ukangaziwe lo kuvame ukuba yinkomo elethole.
“Ngesiko lesintu umkhwenyana ufika ekuseni ehamba lomthimba wakwabo ukuze kukhanye ukuthi ulezihlobo.
Ekufikeni kwabo bafika bahlale phandle komuzi baze bangene ngethuba sebetshelwe ngubabakazi wakulelokhaya ukuthi bangene,” kulandisa uMnu Nyathi.
Lapha koNyathi umkhwenyana ungene ekhaya lomthimba wakwabo behlangabezwa ngumthimba walapha ekhaya uhaya ingoma zesitshikitsha somekezo. Ngemva kwalokho bangeniswa exhibeni bahlaliswa emacansini ngoba ngomkhuba wesintu umkhwenyana ongakaqedi ukulobola uhlaliswa ecansini.
UMthunywa ubuye njalo wakhulumisana loMnumzana Trust Mangena onguyisezala kaNyathi, ochaze ukuthi umkhwenyana lomthimba wakhe batshengiswa abakwabozala ngemva kokuphiwa ukudla.
“Abakhwenyana batshengiswa izihlobo zakwabozala bangaqeda ukudla. Kwandise ukuthi batshengiswe ngubabakazi wentombi ethathwayo beqanjwa munye ngamunye kanye lobuhlobo babo.
“Ngemva kwalokho abakhwenyana bayakhululwa ukuthi bahambe ngoba umsebenzi lo uyabe usuphelile.
Ekuhambeni kwabo basuka lomhlubulo wenyama yembuzi abacolwe ngayo ukuze kubonakale ukuthi bacoliwe kwabozala,” kutsho uMnu Mangena.
Ukucolwa yikuhlaba imbuzi kumbe inkomo njengesitshengiselo sokwamukela umalukazana, umkhwenyana omutsha kumbe umntwana ozelweyo ekhaya.
Ngemva kokucolwa komkhwenyana lo abakoNyathi labo babhekise amabombo eLower Gwelo ukuze umalukazana laye ayebona umuzi wakoMoyo.
Esintwini umalukazana ungeniswa kwabozala ntambama nxa esiyabona umuzi. Ekufikeni kwakhe lomthimba wakwabo ngokufanayo laye uhlaliswa phandle komuzi. Nxa efika ezindleleni eziphambanayo uyakhungwa ukuze adlule kule indawo.
UNkosazana Elizabeth Mpofu unina kaMnu Nyathi ubikele intatheli ukuthi kunengi umalukazana akwenzayo nxa esiyabona umuzi wakwabozala okudinga ukuthi akhungwe.
“Ukuze umalukazana lomthimba wakhe bangene ekhaya kufanele bakhungwe ikakhulu ngenkukhu.
“Bangangena endlini bangaze bakhulunyiswe kabaphenduli ngaphandle kokuthi bakhungwe kuqala.
“Ekuseni umalukazana losanyongwane wakhe bavuka bathanyele iguma babuthelele izibi basuke lapho bayetheza umnyaba wenkuni.
“Inkuni lezi ukuze bazethulwe bayakhungwa kuthi lezibi abazithanyelileyo zibuthwa ngemva kokukhungwa. Linye ngalinye idudu lezibi landise ukukhungwa ngenkukhu,” kugcizelela uNkszn Mpofu.
Umalukazana ngemva kokukhungwa utshengiswe izihlobo zakwabozala andubana acolwe. Ngemva kokucolwa usanyongwane ugqiziswe inyongo yembuzi esandleni senxele basebephiwa umhlubulo wayo babuyela kwabo.
Lokhu kwenziwa nje ngesizatho sokuthi abakwabo babone ukuthi ngempela ucoliwe.
Induna yakulesisigaba uMnumzana Zephania Sigola uchaze ukuthi ulokujabula okukhulu ngokwenziwe nguNyathi lemuli yakhe.
“Ngilokujabula okukhulu ngalokhu okwenziwe nguNyathi ngoba utshengisa ukuvuselela amasiko esizwe sikaMthwakazi.
“UNyathi ube yisibonelo esihle esigabeni ngoba wenelise ukulaya umntanakhe, khathesi uthethwe ngokusemthethweni hatshi ukuzendisa okwenziwa ngabantwana abanengi kulezinsuku,” kuchaza induna uSigola.
UMnu Nyathi uphethe ngokuthi uyajabula ngokwenziwe ngabakhwenyana ngoba balandele isiko lesiNtu.
“Ngijabule kakhulu ngokwenziwe ngabakoMoyo ngoba bethande ukulandela indlela yakithi ngesikhathi bethatha indodakazi yami.
“Sesilindele ukuzwa kibo ukuthi umalukazana wabo uzakwendiswa ngemva komtshado kumbe hatshi,” kuphetha uMnu Nyathi.
