Abaculi besiVenda bavuselela ulimi lamasiko abo

22 Nov, 2017 - 13:11 0 Views
Abaculi besiVenda bavuselela ulimi lamasiko abo UDecent Bhadila lamalunga eVenda Culture Group

uMthunywa

Cornelius Luphahla
NGENXA yokutshabalala kwendimi ezehlukeneyo kuleli abaculi besiVenda sebesungule uhlelo lokuvuselela ulimi lwabo ngokucula nanko phela sebebambisana ekuhwatsheni amadlalade abo becula ngalolulimi.

Abaculi laba bagoqela uDecent Bhadilah, uZhezhington, uDickens Sipho Mathe kanye labanye njalo abaculi abadabuka emhlubulweni weBeitbridge.

UMthunywa ukhulumisane loSipho Mathe ongumholi weqembu le Zezane Culture Club wathi okwenza basungule ingoma zesiVenda yikuthi bajonge ukuvuselela ulimi lwabo kanye lamasiko.

“Okwenza sisungule ingoma zethu ngesiVenda yikuthi sijonge ukuvuselela ulimi kanye lamasiko akithi ngoba singekela ukwenza lokhu engatshabalala. Ngokunjalo abaculi abanengi abasemhlubulweni wethu sebecula ngesiVenda kuphela ngenhloso yokugqugquzela intsha ukuthi iluthakazelele ulimi lolu.

“Ngokunjalo ngilethemba lokuthi abasakhulayo labo bazaluphakamisa ulimi lwethu kanye lamasiko ngoba bebona thina njengabazali babo siluphakamisa ngokucula ngalo,” kutsho uSipho Mathe.

Umculi uDecent Bhadillah ubikele intatheli ukuthi uledlalade lakhe azalikhipha kuviki ezayo elilengoma zesiVenda njalo elilemfundiso enkulu kakhulu.

“Mina ngiledlalade lami elizaphuma mhlaka 16 Lwezi elilengoma eziyisithupha. Idlalade leli lilesihloko esithi Khakhamela njalo ingoma zalo zonke zethula imfundiso enkulu kuzulu. Ingoma yakuqala ithi Arifaraneni, njalo ikhuthaza abantu besiVendeni ukuthi babambisane emisebenzini yonke njalo bafundise intsha mayelana lemikhuba lamasiko abo.

“Kusenjalo idlalade leli liyafundisa njalo ngezothando ikakhulu kwabatsha ukuthi kufanele baphathane njani. Kukhona njalo eyinye ingoma ehaya izibongo zenduna uSitaudze kanye lembali yakhe. Ngokunjalo ngibonga uCaroline Ndlovu, uReemaketsi Mbedzi loSipho Mathe abangincedise ukuhluza ingoma zami ngolimi lwesiVenda,” kuphetha uBhadillah.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds