uMthunywa
Charles Dube – UMfundisi uNdlala webandla leChurch of Children of God kuvele sobala kuviki ephelileyo ukuthi yena utshumayeza abantu izinto yena angazaziyo. Kalandeli izinqumo zombhalo kaNkulunkulu ezinjengokuthi yena njengomfundisi kumele aphume ayedinga izimvu zikaNkulunkulu ezilahlekileyo. Sikubonile ukuthi yena nxa zifika izimvu zolahleko uzixotshela iganga ukuthi ziyedliwa yizilwane kunye labaphangi.
Kuvele sobala lokhu ekuxotsheni kwakhe uQakisiwe ofike kuye engogula kanzima njalo emtshela ukuthi abafowabo bamthwalise nzima bethi nguye owabulalisa unina ngabantu. Kuliqiniso lokho, kodwa yena uMfundisi Ndlala endaweni yokuthi amemukele uyamxotsha phakathi kobusuku ethi kayexolisa kubafowabo njalo kaye esibhedlela ayekwelatshwa lowo mkhuhlane omkhathazayo. UMfundisi omkhulu walelobandla ohambela amabandla kuzigaba zonke uyasisola isenzo sikaNdlala.
UMfundisi uTshawuke utshela uNdlala ukuthi bekungamelanga axotshe indodana yolahleko ethi ngokwenzenjalo uphambanise kakhulu. UTshawuke wambuza njalo uNdlala ukuthi angazibulala wayezathini. Wabuza njalo ukuthi pho lungaphi ukholo luka Ndlala nxa esehluleka ukunceda abantu abadinga uncedo? Wayaphambili ethi umntwana lowo uNdlala kwakumele ameluleke, amuphe ukudla lomuthi wokumsiza kanye lendawo yokulala.
Ngokwehluleka ukwenza konke lokhu kusobala ukuthi uMfundisi uNdlala wayehlulwe ngumsebenzi. Yikho nje ngeviki ephelileyo saphetha udaba lwethu ngokucaphuna kugwalo olungcwele lapho okuthiwa, “Kayisibo bonke abathi Nkosi, Nkosi, abazawubona umbuso weZulu.” Njengaye uMfundisi uNdlala owatshona etshumayeza abantu ngombuso weZulu kodwa esehluleka ukulandela imbhalo. Sitshiye njengokucabanga kukaMfundisi uTshawuke sekufike umntwana ezotshela uNdlala ukuthi kulentombazana eyayikhonza lapho eyayizibophele.
UMfundisi Tshawuke wathi, “Khangela khathesi umsebenzi wakho Ndlala,” esukuma elandela uNdlala owayesephuma emnyango. Ukuphuma kukaNdlala ngesiphangiphangi kwakungasancedi lutho, laselidume ledlula, wayesefile uQakisiwe aye yale ukumsiza. Wayeqondile uTshawuke ukuthi ambuze uNdlala ukuthi pho ukholo lwabo lwalungaphi, njalo emtshela ukuthi abafanelanga ukuba ngabafundisi.
Lokhu wathi kungoba bona bazi kuphela ukuma phambi kwabantu abalungileyo. Abakwazi ukuphuma ijumo bayedinga izimvu ezilahlekileyo. Lezibuya zodwa abenelisi ukuzemukela. Wabuza kuNdlala ukuthi bangabafundisi abanjani? Wathi yena ngokholo lwakhe olutsha kasoze asebenze labafundisi abanjengabo Ndlala. Waphetha ngokuthi kungangcono asebenze yedwa.
Zwana isiphetho salolugwalo kuviki ezayo.
