A-Level: Umvuzo Wezinyembezi

04 Jun, 2015 - 10:06 0 Views

uMthunywa

Charles Dube – Siqala udaba lwethu usane lukaSehliselo selutshontshiwe omakhelwana sebefikile ukuzozwisisa ukuthi isililo ngesani. Unina kaSehliselo uMaMbambo wayekhala ngomntanakhe ethi uzaqonda ngaphi. Lanxa wayekhala uMaMbambo wabona kufanele ukuthi abatshele abantu ngesiga leso ukuze bamphathise. Walulandisa lonke udaba lokufika kukamama othize owayezembathise esemvu yena eyimpisi ephangayo. Wayethe ibizo lakhe nguSisa Nkabinde ewathi mfe amanga.

Amapholisa afika endlini kaMaMbambo abantu ababezezwisisa ukuthi kwenzenjani babelokhu beyisiyokotho, beyabuzela sampethu esidunjini sendlovu. Isililo sasesiqonge ngamandla. Amapholisa athi efika isiyaluyalu sabantu kanye lesililo kwehla. USehliselo nguye owaqhubeka ekhala. Wayezama ukuvala isazela sokuthi konke lokhu kwakuliqhinga lakhe. Amapholisa abuza ukuthi umama lowo owayenyamalale lomntwana wayelele ngaphi, lokuthi babebone ngesikhathi bani ukuthi umntwana usetshontshiwe.

Umakhelwana kaMaMbambo uMaNkala wayelokhu engakasizwa isehlakalo leso. Waqoqodelwa nguMaMoyo umakhelwana wakhe, owamlandisela ngaleso sehlakalo. UMaNkala wamane wathi wayemazi lowo mama njalo wayekwazi lapho ayehlala khona. UMaMoyo kwamqeda amandla esizwa ukuthi umama owayebe umntwana uyaziwa. Sebefike koMaMbambo, uMaNkala wahle wakubeka obala ukuthi umama lowo uyamazi kanye lalapho ahlala khona. Wayembone ngayizolo wamfanisa uze wabuya kuhle engqondweni yakhe eselele.

Wathi uyabazi bonke abantu bakhona babeloje kumakhelwana wabo eMzilikazi. Unina nguMaMpofu njalo kuthiwa yisalukazi esiloyayo. Abanye babesithi njalo uyeba abantwana ayebacuya. Kwakuliqiniso lokho na? Mamo! Amanina enela ukuzwa lokho ahlanya. Kabathandanga ukusa udaba lolo emapholiseni, ayezaphuza abuye alupholise, udaba lonke luze lonakale. Amanina la ayefuna ukuyazilungisela ngezabo izandla.

Kwathi sekuqala ukukhudumala, yabopha eyamanina eMakhandeni, ehla ehamba ngezinyawo esiya eMzilkazi ku “O” Square engadlanga nkobe zamuntu. Ayesiyahlasela indlu kaMaMpofu bengelaqiniso lokuthi nguye owayetshontshe umntwana. Umama labo bahlangana lobhobo lwabontanga olwaluzondiswe yikuthi umhlabeleli womdumo weDigong wayengasabuyanga ukuzobathokozisa enkundleni ye Barbourfields. Basuka lapho ontanga labo sebediliza loba yisiphi isakhiwo. Betshaya izindlu, izimota zabantu ngamatshe.

Ontanga bawela kuxuku labomama lelaliklabalala begombolozele indlu kaMaMpofu bephethe amaphepha amakhulu ayelemibhalo eyehlukeneyo ethi: “Sifuna umntwana mthakathi, hamba uyeloya ekhaya MaMpofu.

Asisuki endlini yakho singela mntwana.” Khumbula ukuthi kulicala eZimbabwe ukuthi omunye umuntu uyaloya.

Omama labo babeseqa begida behlabela ingoma ethi: “Nguwe nkalakatha,” njalonjalo.

Ontanga ababizwa kuthiwa zinhlanya zikaMgandane, ezingancengiyo, abazange babuze elangeni bahle bayitsho ngamatshe indlu kaMaMpofu. UMaMpofu uthe esizwa seziminya wacatsha emkulwini lakhona zaminya. Wathi ephuma ethi uyacatsha esambuzini wahlangabezwa yilitshe elamtshaya ekhanda wathi vutshalala phansi.

Ontanga bathi sebeyitshaye bayiqeda indlu bangena phakathi babutha impahla ezaziphakathi. Amanina amalutshwana angena endlini bavula ewodilobhini bedinga usane olwalwebiwe. Babengaluthola?

UMaMpofu owayelimele kakubi watshona ngemva kwensuku ezimbalwa. Nguye owayetshontshe umntwana na? Zwana lokhu ngokulandela amakhasi la kuphephandaba likaZulu uMthunywa.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds