uMthunywa
Lulotshwe nguJabulani C Buthelezi
Lwakhitshwa yi-Maskew Miller Longman
Sekulesikhathi eside simile ukulandela imbali kaMbabhadisi John Ngubane owayebhungukile watshiya umuzi wakhe eLa Lucia. Khumbula ukuthi wayesephila impilo kamasihlalisane esebaleke watshiya uMaMthimkhulu labantwana.
Lapho esacina khona satshiya uNgubane esephendukile eMpaphala, efikele kumalumakhe uCele owayesemnika isifundo ngempilo. Kakhekhelezi uCele ukutshela umzukulu wakhe ukuthi usendleleni yokulahlwa yembubhiso.
UCele ufundisa uNgubane ngokukholwa nxa ebuza ngakho lokho. UCele uthi, “IZwi lithi ukukholwa ngukuqiniseka ngezinto ezithenjwayo, ngukuqiniseka ngezinto ezingabonwayo, ngoba okubonwayo akuvelanga kokubonwayo.” Nxa uNgubane etshela umalumakhe ukuthi kwajula lokho kukhuluma njalo ebuza ukuthi engakuzuza njani lokho kukholwa; uCele umtshela ukuthi kulula kakhulu lokho. Kakuzwisisi ukuthi kulula ngayiphi indlela uNgubane.
Ekuphenduleni lowo mbuzo uCele uthinta umlomo wethumba elikuNgubane. UCele utshela uNgubane ukuthi nxa efuna ukuzwa lokwazi ngokukholwa kalande umkakhe. Isimanga yikuthi uNgubane ubuza umalumakhe ukuthi wuphi umkakhe? Ngengqondo yakhe langokwenza kwesiLungu, uNgubane lomkakhe owaziwa nguCele uMaMthimkhulu sebehlukana. NgokwesiNtu uCele kakwazi lokho — kuye kwakumele oNgubane lowangakwakhe kwakumele babize abantu nxa sebechitha umtshado wabo.
Uvuka ngolaka uCele etshela umzukulu wakhe uNgubane ukuthi engambuzi ukuthi wuphi umkakhe. Umka Ngubane munye, laye uyakwazi lokho. Umkakhe nguMaMthimkhulu. Akekho futhi oyathatha indawo yakhe.
Omasihlalisane bakaNgubane ngeke neze bayithathe indawo kaMaMthimkhulu, laye uyakwazi lokho. Akula futhi oyothatha indawo yakhe. Ilizwi likaMaMthimkhulu linkenteza ezindlebeni zikaNgubane, intokomalo kaMaMthimkhulu ivininiza empilweni kaNgubane yonke, imhlasela loba sebengasese lomasihlalisane wakhe.
Uyaqinisa uCele ethi uMbabhadisi kalande uMaMthimkhulu. UNgubane ubhoboka etshela umalumakhe ukuthi uMaMthimkhulu akaseyena umkakhe, sebayidabula incwadi yomtshado. Uyabuza uCele ukuthi kanti babehlanganiswe yincwadi yomtshado yini? UCele uthi izincwadi lezi yinto yezolo efika labeLungu. Uyaphambili ethi umtshado wabo wahlanganiswa ngabalele, amadlozi phela.
Bawuhlanganisa ngezinkomo ezaya koMaMthimkhulu Kanye lezinkomo ezahlatshwa koMaMthimkhuluu kanye lakoNgubane ngesikhathi betshada.
Uyabuza-ke uCele kuNgubane ukuthi kambe bahlaba babika nxa sebesehlukana? Nxa bengabikanga kutsho ukuthi abehlukene. Umkhumbuza lokuthi umtshado wabo wahlanganiswa esontweni phambi kwabafakazi abanengi, laphambi kukamfundisi leNkosi yabo. UCele uqhubeka ethi kakwazi loba bababiza abantu ukuze babe ngofakazi, futhi babiza umfundisi leNkosi ngesikhathi besehlukana. Uma bengakwenzanga lokho kabehlukene phambi kwabantu, phambi kwabafundisi laphambi kwenkosi.
Kuthiwa kakhumbule njalo uNgubane ukuthi bahlanganiswa yizingane zabo. Lesi simo senza kube lukhuni ukwehlukanisa umtshado lowo. Kuyamsinda uNgubane ezwakale ethi kayikho lencane indlela yokuthi amlande uMaMthimkhulu. Uthi behlukaniswa emajajini, loMaMthimkhulu engathi usangene uma engathi uyamlanda.
