uMthunywa
Charles Dube
LAMHLANJE siphetha ukubalwa kwakuqala kogwalo Impi YabomDabu Isethunjini. Sebephendukile ekhaya ababebhungukile baphila impilo yabomasihlalisane. UJohn Mbabhadisi usebuyile ekhaya kodwa ufikela komalumakhe uCele. Ufika koCele nje uyathubela uNgubane kazi lokuthi wenzani kanti uzahlangana lokukhulu.
Imuli kaNgubane iyahlangana lapha koCele. Uhlangana lomkakhe uMaMthimkhulu ayembalekele wamtshiya labantwna eLa Lucia. Kuseselesithuli sokuhlangana kukaMaMthimkhulu lomyeni wakhe wokubhunguka uNgubane umntakaHlanganisani uZaneqiniso ulokhu ebuza imbuzo edinga iqiniso njengebizo lakhe kuJohn Mbabhadisi lomkakhe uMaMthimkhulu. Uyabuza ukuthi bazolalaphi abuye aziphendule athi bazolala ngakibo eMfangidelile khona bezabaxoxela izindaba babafundele izincwadi bengakalali ngoba bona loNjabulo abenelisi ukulala uma engekho obafundela izincwadi.
Babhekana oMaMthimkhulu loNgubane bengazi ukuthi bazoyiphendula bathini imbuzo yaleyo ngane. Bancedwa nguCele owathi kuHlanganisani athathe indodana yakhe basaxoxa abadala. Sebehambile oHlanganisani loZaneqiniso, uCele wathi uyethemba lokuba bayizwile ingane oMaMthimkhulu lo Ngubane. Njengekholwa uCele wacupha amazwi kuncwadi engcwele iBhayibhili ethi: “Emilonyeni yezingane kuphuma iqiniso lodwa.”
Waqhubeka uCele ethi uNgubane loMaMthimkhulu kumele bayongeniswa kwaNgubane futhi bahlatshiswe khona.
Wathi lapha ekhaya kukwaCele, akukhona kwaNgubane. UNgubane yena uphutsha ngelokuthi kufuneka aphindise imota yokuqhatshwa ayehamba ngayo khona eThekwini ngalobo busuku kungakatshayi ihola lika -10. UHlanganisani ekuzwa lokho wathi uNgubane angazihluphi ngalokho uVikizitha wayezoyihambisa.
Kwacetshwa ukuba bonke behlele ngaseMfangidelile lapho abazakwenza khona izinyane lokubonga ukuhlanganiswa kwabo bonke ngaleyo ndlela. UCele wabaxwayisa ukuba balande ugogo waseNhlalayenza, Kanye logogo lomkhulu waseMzingaye uma babezowisa izinyane. UMaMthimkhulu yena ebuzwa ukuthi uthini ngohlelo lukaHlanganisani, kaphendulanga kodwa kuthiwa wakhala waze waba lesilokozane. Ekuthuleni kwakhe wathatha iculo elithi:
“Nginezono eziningi
Ezihluph’umoya wami
Nkosi Jesu Wena ungumsizi wami
Nkosi Jesu Wena ungumhleni wami.”
Ngemuva kweculo uMaMthimkhulu wathi bamvumele ahlambuluke. Wathi yena kalaso isibindi sokubabheka abakoCele, noma sokukwazi ukuzibheka lezi zingane zikaLinono. Wathi unya lwakhe baluphindisela ngomusa wodwa. Wathi bazenyula izingane zakhe bazikhweza ezindaweni ezibanzi. Wathi ngabo izingane zabo zathola ukuba zibe lobuntu, ngabo izingane zabo zawela zaya phetsheya, ngabo izingane zabo zaba ngutho, ngabo namhla bayahlanganiswa njengomndeni loNgubane lezingane zabo.
Wacela ukuba babathethelele abakoCele ngokuphambuka kwabo. Wacela ukuthi uVikizitha abathethelele laye ngokumenza intandane bona bephila yena loyise. Wabonga lokuthi ukudeda kwabo kwenza uVikizitha wathola abazali abangcono oHlanganisani, o-Uzithelile kanye labakoCele.
